ಬಂಟ್ವಾಳ:ತುಂಬೆ ವೆಂಟೆಡ್ ಡ್ಯಾಂ ನಿಂದ ರೈತರು ಕೃಷಿ ಜಮೀನು ಕಳೆದುಕೊಂಡು ಬೀದಿ ಪಾಲಗುವ ಭೀತಿ

ಬಂಟ್ವಾಳ: ಮಂಗಳೂರು ಮಹಾನಗರಕ್ಕೆ ಕುಡಿಯುವ ನೀರಿನ ಹಿನ್ನಲೆಯಲ್ಲಿ ನಿರ್ಮಾಣವಾಗುತ್ತಿರುವ ತುಂಬೆ ವೆಂಟೆಡ್ ಡ್ಯಾಂ ನಿಂದ ಬಂಟ್ವಾಳದ ರೈತರು ಕೃಷಿ ಜಮೀನು ಕಳೆದುಕೊಂಡು ಬೀದಿ ಪಾಲಗುವ ಕಾಲ ಸನ್ನಿಹಿತವಾಗಿದೆ. ರೈತರಿಗೆ ಯಾವುದೇ ಮಾಹಿತಿ ನೀಡದೆ ಜಮೀನಿನ ಸರ್ವೆ ನಡೆಸದೆ ಪರಿಹಾರ ನೀಡದೆ ಕೃಷಿ ಭೂಮಿಯನ್ನು ಮುಳುಗಡೆ ಗೊಳಿಸುವ ದಿನ ತುಂಬ ದೂರವಿಲ್ಲ. ತುಂಬೆ ವೆಂಟೆಡ್ ಡ್ಯಾಂನ ಬಹತೇಕ ಕೆಲಸ ಕಾರ್ಯಗಳು ಮುಕ್ತಾಯದ ಹಂತದಲ್ಲಿದೆ ಮಾಹಿತಿಯ ಪ್ರಕಾರ ನವೆಂಬರ್ ತಿಂಗಳಲ್ಲಿ ಇದರ ಉದ್ಘಾಟನೆಗೊಳ್ಳಲಿದೆ ಎಂದು ಹೇಳಲಾಗುತ್ತಿದೆ. ಆದರೆ ಈವರೆಗೆ ರೈತರನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳು ಕನಿಷ್ಟ ಕೆಲಸವೂ ಜಿಲ್ಲಾ ಮಟ್ಟದಲ್ಲಿ ಆಗಿಲ್ಲ ಎನ್ನವುದೇ ದುರಂತ. ಹಾಗಾಗಿ ಕೃಷಿಕರು ಹಡೀಲು ಗದ್ದೆಯಲ್ಲಿ ಕೃಷಿ ಕ್ರಾಂತಿ ನಡೆಸಿ ಆ ಮೂಲಕ ಸರಕಾರದ ಗಮನ ಸೆಳೆಯುವ ಪ್ರಯತ್ನವನ್ನು ಮಾಡುತ್ತಿದ್ದಾರೆ.

ತುಂಬೆ ವೆಂಟೆಡ್ ಡ್ಯಾಂ ನಿರ್ಮಾಣದಿಂದಾಗಿ ಕಳೆದ 13 ವರ್ಷಗಳಿಂದ ಮುಳುಗಡೆ ಭೀತಿ ಎದುರಿಸುತ್ತಿರುವ ಹಡೀಲು ಗದ್ದೆಯಲ್ಲಿ ಡ್ಯಾಂ ಸಂತ್ರಸ್ತ ರೈತರು ಕೃಷಿ ಕ್ರಾಂತಿ ನಡೆಸಲು ನಿರ್ಧರಿಸಿದ್ದಾರೆ. ಮನಪಾ ನಡೆಸಿದ ಸರ್ವೇ ಕಾರ್ಯಕ್ಕೆ ಆಕ್ಷೇಪ ಸಲ್ಲಿಸಿ ಭಾರೀ ಮೌಲ್ಯದ ಸರ್ವೇ ಯಂತ್ರವನ್ನು ವಶಪಡಿಸಿ ನ್ಯಾಯೋಚಿತ ಪರಿಹಾರಕ್ಕಾಗಿ ಜಿಲ್ಲಾಡಳಿತದ ಗಮನ ಸೆಳೆದಿದ್ದ ಸಂತ್ರಸ್ತ ರೈತಾಪಿ ವರ್ಗ ಇದೀಗ ಪಾಳುಬಿದ್ದಿರುವ ಹಡೀಲು ಗದ್ದೆಯಲ್ಲಿ ಬೇಸಾಯ ಆಂದೋಲನ ಕೈಗೆತ್ತಿಕೊಂಡಿರುವ ರೈತರು ಮತ್ತೆ ಸರಕಾರದ ಗಮನ ಸೆಳೆಯಲು ಹೊರಟಿದ್ದಾರೆ. ಕರ್ನಾಟಕ ರಾಜ್ಯ ರೈತ ಸಂಘ ಹಸಿರು ಸೇನೆ ವತಿಯಿಂದ ಜಿಲ್ಲೆಯ ಪ್ರಗತಿಪರ ಕೃಷಿಕ ರಾಜೇಶ್ ನಾಯಕ್ ಅವರ ನೇತೃತ್ವದಲ್ಲಿ ನಡೆಯಲಿರುವ ತುಳುನಾಡ ಕೃಷಿ ಕ್ರಾಂತಿ ಕಾರ್ಯಕ್ರಮವನ್ನು ಸಜೀಪಮುನ್ನೂರು ಗ್ರಾಮದ ನಂದಾವರ ಕೊಪ್ಪಳ ಬಯಲಿನಲ್ಲಿ ಆರಂಭಗೊಳ್ಳಲಿದೆ. ಸಜೀಪಮುನ್ನೂರು ಗ್ರಾಮದ ಸರ್ವೇ ನಂಬ್ರ 169/4ರಲ್ಲಿರುವ ಸುಮಾರು 9 ಎಕರೆ ಜಮೀನಿನಲ್ಲಿ ಕೊಳಕೆ ಸಾಗುವಳಿ ನಡೆಸಲಾಗುವುದು ಎಂದು ಕಾರ್ಯಕ್ರಮದ ರೂವಾರಿ, ರೈತ ಸಂಘದ ಬಂಟ್ವಾಳ ತಾಲೂಕು ಸಮಿತಿಯ ಉಪಾಧ್ಯಕ್ಷ ಎನ್.ಕೆ. ಇದ್ದಿನಬ್ಬ ಅವರು ತಿಳಿಸಿದ್ದಾರೆ.

ತುಂಬೆ ಹೊಸ ವೆಂಟೆಡ್ ಡ್ಯಾಂ ನಿರ್ಮಾಣದಿಂದ ಮುಳುಗಡೆಗೊಳ್ಳಬಹುದೆಂಬ ಯೋಚನೆಯಿಂದಾಗಿ ನೇತ್ರಾವತಿ ನದಿಯ ಪಾತ್ರದ ಕೃಷಿ ಭೂಮಿಯಲ್ಲಿ ಕಳೆದ 13ವರ್ಷಗಳಿಂದ ಬತ್ತದ ಸಾಗುವಳಿಯನ್ನು ಸಂಪೂರ್ಣ ನಿಲ್ಲಿಸಲಾಗಿತ್ತು. ಕಳೆದ ತಿಂಗಳು ಮನಪಾ ಮೇಯರ್ ಹರಿನಾಥ್ ಹಾಗೂ ಸ್ಥಳೀಯ ಜಿಪಂ ಸದಸ್ಯ ಚಂದ್ರಪ್ರಕಾಶ್ ಶೆಟ್ಟಿ ಅವರು `ತುಂಬೆ ಹೊಸ ಡ್ಯಾಂನಲ್ಲಿ 5 ಮೀಟರ್‍ಗಿಂತ ಹೆಚ್ಚು ನೀರು ಸಂಗ್ರಹಿಸಲು ಬಿಡುವುದಿಲ್ಲ’ ಎಂದು ಹೇಳಿಕೆ ನೀಡಿರುವ ಹಿನ್ನೆಲೆಯಲ್ಲಿ ಸಜೀಪಮುನ್ನೂರು ಗ್ರಾಮದ ಎಲ್ಲಾ ಪಾಳು ಗದ್ದೆ ಪ್ರದೇಶಗಳಲ್ಲಿ 2 ಹಾಗೂ 3ನೇ ಸಾಗುವಳಿ ಮಾಡಲು ನಿರ್ಧರಿಸಲಾಗಿದೆ ಎಂದು ರೈತ ಸಂಘದ ಬಂಟ್ವಾಳ ತಾಲೂಕು ಅಧ್ಯಕ್ಷ ಶರತ್ ಕುಮಾರ್ ಅವರು ಪ್ರತಿಕ್ರಿಯಿಸಿದ್ದಾರೆ.

ಮುಳುಗಡೆ ಪ್ರದೇಶವಾದ ನಂದಾವರ ಗೌಡ ಪಾಲು ಗದ್ದೆಯಲ್ಲಿ ಮಂಗಳವಾರ ರೈತರು ನಡೆಸಿದ ಸಭೆಯಲ್ಲಿ ಸಾವಿರಾರು ಸಂತ್ರಸ್ತ ರೈತರ ಬೇಡಿಕೆಗಳನ್ನು ಮುಂದಿಟ್ಟು `ಹಡೀಲು ಗದ್ದೆಯಲ್ಲಿ ಕೃಷಿ ಕ್ರಾಂತಿ’ ನಡೆಸಲಾಗುವುದಾಗಿ ನಿರ್ಧರಿಸಲಾಗಿದೆ. ರೈತ ಮುಖಂಡರಾದ ಎನ್.ಕೆ.ಇದ್ದಿನಬ್ಬ ಅವರ ನೇತೃತ್ವದಲ್ಲಿ ಸಭೆಯಲ್ಲಿ ಮುಖಂಡರಾದ ಮನೋಹರ್ ಶೆಟ್ಟಿ, ಸಂಘಟಕರಾದ ಶರತ್ ಕುಮಾರ್, ಸುದೇಶ್ ಮಯ್ಯ, ಸತೀಶ್ ಗೌಡ ಮತ್ತಿತರ ರೈತರು ಸಭೆಯಲ್ಲಿ ಪಾಲ್ಗೊಂಡು ಚರ್ಚಿಸಿದರು. ಮುಳುಗಡೆಯಾಗುವ ಜಮೀನಿನ ಸ್ಪಷ್ಟ ಮಾಹಿತಿ, ಮರು ಸರ್ವೇ ನಡೆಸಿ ಮುಳುಗಡೆಯಾಗುವ ಜಮೀನಿನ ಗಡಿಗುರುತು, ಸರ್ವೇ ಕಾರ್ಯ ಕೈಗೊಳ್ಳುವ ಮೊದಲು ರೈತರಿಗೆ ವೈಯಕ್ತಿಕ ನೊಟೀಸ್ ಜಾರಿಗೊಳಿಸಬೇಕು. ಸಂತ್ರಸ್ತರಿಗೆ ನ್ಯಾಯೋಚಿತ ಪರಿಹಾರ ವಿತರಿಸಬೇಕೆಂದು ರೈತ ಮುಖಂಡರು ಆಗ್ರಹಿಸಿದರು.

ಸ್ಪಷ್ಟ ಮಾಹಿತಿ ಇಲ್ಲ!
ಜಿಲ್ಲಾಧಿಕಾರಿ ಎ.ಬಿ.ಇಬ್ರಾಹಿಂ ಅಧ್ಯಕ್ಷತೆಯಲ್ಲಿ ನಡೆದ ಮನಪಾ ಅಧಿಕಾರಿಗಳ, ಸ್ಥಳೀಯ ಜನಪ್ರತಿನಿಧಿಗಳ ಹಾಗೂ ರೈತರ ಸಭೆಯಲ್ಲಿ ಡ್ಯಾಂಅನ್ನು 7 ಮೀಟರ್ ಎತ್ತರಕ್ಕೆ ನಿರ್ಮಿಸಲಾಗುತ್ತಿದ್ದು, ಡ್ಯಾಂ ಎತ್ತರ 8 ಮೀಟರ್ ವ್ಯಾಪ್ತಿಯಲ್ಲಿ ಮುಳುಗಡೆಗೊಳ್ಳಲಿರುವ ಪ್ರದೇಶಗಳ ಸರ್ವೇ ಕಾರ್ಯ ನಡೆಸಲಾಗುವುದಾಗಿ ನಿರ್ಧರಿಸಲಾಗಿತ್ತು. ಆದರೆ ಹೊಸ ಡ್ಯಾಂ ಅನ್ನು 12 ಮೀಟರ್ ಎತ್ತರಕ್ಕೆ ನಿರ್ಮಾಣವಾಗಲಿದೆ ಎಂದು ಅಧಿಕಾರಿಗಳು ಇನ್ನೊಂದೆಡೆ ಮಾಹಿತಿ ನೀಡಿದ್ದರು. ಇದೀಗ ಮೇಯರ್ ಹರಿನಾಥ್ ಹಾಗೂ ಸ್ಥಳೀಯ ಜಿಪಂ ಸದಸ್ಯ ಚಂದ್ರಪ್ರಕಾಶ್ ಶೆಟ್ಟಿ ಅವರು ಡ್ಯಾಂನಲ್ಲಿ 5 ಮೀಟರ್‍ಗಿಂತ ಹೆಚ್ಚು ನೀರು ಸಂಗ್ರಹಿಸಲು ಬಿಡುವುದಿಲ್ಲ ಎಂದು ಹೇಳಿಕೆ ನೀಡಿದ್ದರಿಂದ ಗೊಂದಲದ ವಾತಾವರಣ ಉಂಟಾಗಿದೆ. ಅಧಿಕಾರಿ ಹಾಗೂ ಜನಪ್ರತಿನಿಧಿಗಳ ಅಸ್ಪಷ್ಟತೆಯಿಂದಾಗಿ ರೈತಾಪಿ ವರ್ಗವನ್ನು ಚಿಂತೆಗೀಡು ಮಾಡಿದೆ ಎಂದು ರೈತರ ಸಂಘದ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಮನೋಹರ್ ಶೆಟ್ಟಿ ಅವರು ತಿಳಿಸಿದ್ದಾರೆ.

ಬೆಳೆ ನಷ್ಟಕ್ಕೆ ಯಾರು ಹೊಣೆ?
ಮುಳುಗಡೆ ಪ್ರದೇಶಗಳ ಸ್ಪಷ್ಟ ಮಾಹಿತಿ ಇಲ್ಲದೇ ಇರುವುದರಿಂದಾಗಿ ಈ ವರ್ಷವೂ ಬೇಸಾಯ ಮಾಡಲು ರೈತರು ಹಿಂದೆ-ಮುಂದೆ ನೋಡುತ್ತಿದ್ದಾರೆ. ಆಷಾಢದಲ್ಲಿ ಪಟ್ಲ ಬೆಳೆಗೆ ಚಾಲನೆ ನೀಡಿ, ಜನವರಿಯಲ್ಲಿ ಕೊಯ್ಲಿಗೆ ಸಿದ್ಧವಾಗುತ್ತದೆ. ನವೆಂಬರ್‍ನಲ್ಲಿ ನೀರು ಶೇಖರಣೆಗೊಂಡು ಬೆಳೆ ಸಂಪೂರ್ಣ ನಾಶಗೊಳ್ಳುವ ಅಪಾಯವೂ ಇದೆ. ಈ ನಷ್ಟಕ್ಕೆ ಯಾರು ಹೊಣೆ ಎನ್ನುತ್ತಾರೆ ಸ್ಥಳೀಯ ಕೃಷಿಕ, ಸಜೀಪಮುನ್ನೂರು ಗ್ರಾಪಂ ಮಾಜಿ ಅಧ್ಯಕ್ಷ ಯೂಸುಫ್ ಕರಂದಾಡಿ ಅವರು.
ನವಂಬರ್ ಹಾಗೂ ಡಿಸಂಬರ್ ಸಂದರ್ಭ ಹಡೀಲು ಗದ್ದೆಯಲ್ಲಿ 9 ಎಕರೆ ಕೊಳಕೆ ಸಾಗುವಳಿ ನಡೆಸಲು ನಿರ್ಧರಿಸಿದ್ದೇವೆ. 2 ಹಾಗೂ 3ನೇ ಬತ್ತದ ಸಾಗುವಳಿ ಸಂದರ್ಭ ಕೃಷಿ ಭೂಮಿ ಮುಳುಗಡೆಯಾದಲ್ಲಿ ರೈತರು ಎದುರಿಸಲಿರುವ ಅಪಾರ ಬೆಳೆ ಹಾನಿಗೆ ಮೇಯರ್ ಹಾಗೂ ಜಿಪಂ ಸದಸ್ಯರೇ ಹೊಣೆಗಾರರಾಗುತ್ತಾರೆ.