ಇಂದೋರ್: ಇದೇ ಅ.8ರಂದು ಚಂದ್ರನನ್ನು ಭೂಮಿ ಸಂಪೂರ್ಣ ಮುಚ್ಚಿ ಖಗ್ರಾಸ ಚಂದ್ರಗ್ರಹಣ ಉಂಟು ಮಾಡಲಿದೆ ಎಂದು ಖಗೋಳ ವಿಜ್ಞಾನಿಗಳು ಹೇಳಿದ್ದಾರೆ.
”ಅ.8ರ ಮಧ್ಯಾಹ್ನ 2.44 ಗಂಟೆಗೆ ಸರಿಯಾಗಿ ಚಂದ್ರಗ್ರಹಣ ಆರಂಭಗೊಳ್ಳಲಿದೆ. ಇದು ಸಂಜೆ 6.4 ಗಂಟೆಗೆ ಮುಗಿಯಲಿದೆ. ಬರೋಬ್ಬರಿ 3.20 ಗಂಟೆಗಳ ಕಾಲ ಚಂದ್ರಗ್ರಹಣ ಕಾಣಿಸಲಿದೆ. ಖಗ್ರಾಸ ಗ್ರಹಣ ಸುಮಾರು 23 ನಿಮಿಷಗಳ ಕಾಲ ಇರಲಿದೆ. ಈ ವೇಳೆ ಚಂದ್ರನನ್ನು ಸಂಪೂರ್ಣ ಮುಚ್ಚುವಂತೆ ಅಡ್ಡ ಬರುವ ಭೂಮಿ, ಸೂರ್ಯನಿಂದ ಚಂದ್ರನ ಮೇಲೆ ಬೀಳುವ ಬೆಳಕನ್ನು ಇಷ್ಟು ಕಾಲ ಹಿಡಿದು ಬಿಡುತ್ತದೆ,” ಎಂದು ಇಲ್ಲಿನ ತಾರಾಲಯದ ಸೂಪರಿಂಟೆಂಡೆಂಟ್ ಡಾ.ರಾಜೇಂದ್ರ ಪ್ರಕಾಶ್ ಗುಪ್ತಾ ಹೇಳಿದ್ದಾರೆ.
ಸೂರ್ಯ ಮತ್ತು ಚಂದ್ರನ ನಡುವೆ ಭೂಮಿ ಬಂದಾಗ ಚಂದ್ರಗ್ರಹಣ ಸಂಭವಿಸುತ್ತದೆ. ಖಗ್ರಾಸ ಚಂದ್ರಗ್ರಹಣದ ವೇಳೆ ಸೂರ್ಯ, ಭೂಮಿ ಮತ್ತು ಚಂದ್ರ, ಈ ಮೂರೂ ಕಾಯಗಳು ಒಂದೇ ರೇಖೆಯ ಮೇಲೆ ಇರುತ್ತವೆ. ಅ.8ರ ಖಗ್ರಾಸ ಚಂದ್ರಗ್ರಹಣ ಈಶಾನ್ಯ ರಾಜ್ಯಗಳಲ್ಲಿ ಸ್ಪಷ್ಟವಾಗಿ ಕಾಣಲಿದೆ. ಏಕೆಂದರೆ ಈಶಾನ್ಯದ ಅಸ್ಸಾಂ, ಮಣಿಪುರ, ಮಿಜೊರಾಂ, ನಾಗಾಲ್ಯಾಂಡ್, ಅರುಣಾಚಲ ಪ್ರದೇಶ, ತ್ರಿಪುರಾ, ಮೇಘಾಲಯ ರಾಜ್ಯಗಳಲ್ಲಿ ಚಂದ್ರ ಉಳಿದ ರಾಜ್ಯಗಳಿಗಿಂತಲೂ ಬೇಗನೇ ಮೂಡುತ್ತಾನೆ.
ಈ ವರ್ಷದ ಎರಡನೇ ಮತ್ತು ಕೊನೆಯ ಚಂದ್ರಗ್ರಹಣ ಇದಾಗಿದೆ. ಕಳೆದ ಏ.15ರಂದು ಕೂಡ ಚಂದ್ರಗ್ರಹಣ ಸಂಭವಿಸಿತ್ತು.