ವಿಟ್ಲ: ಚಿನ್ನ ತೊಳೆದು ಕೊಡುವ ಯುವಕನೊಬ್ಬ ಆ್ಯಸಿಡ್ ಮಿಶ್ರಿತ ನೀರಿನಲ್ಲಿ ಕರಿಮಣಿ ಸರವನ್ನು ತೊಳೆದು ಮಹಿಳೆಗೆ ಮೋಸ ಮಾಡಿದ ಘಟನೆ ಬುಧವಾರ ಮಂಕುಡೆ ಸಮೀಪ ನಡೆದಿದೆ. ಮಂಕುಡೆ ಶಾಲೆ ಬಳಿಯ ಮನೆಗೆ ಬಂದ ಹಿಂದಿ ಮಾತನಾಡುವ ಯುವಕನೊಬ್ಬ ಪಾತ್ರೆ, ಸರ ಪಾಲಿಶ್ ಮಾಡಿಕೊಡುವುದಾಗಿ ಹೇಳಿದ್ದ. ಆ ಬಳಿಕ ಮನೆಯ ಮಹಿಳೆಯ ಕತ್ತಿನಲ್ಲಿದ್ದ ಕರಿಮಣಿ ಸರವನ್ನು ಕಂಡ ಆ ಯುವಕ ತನ್ನಲ್ಲಿದ್ದ ಹುಡಿಯೊಂದನ್ನು ನೀಡಿ ಸರವನ್ನು ತೊಳೆಯುವಂತೆ ಹೇಳಿದ್ದ. ಆತನ ಕೈಯಿಂದ ಹುಡಿ ಪಡೆದ ಮಹಿಳೆ ತನ್ನ ಮಕ್ಕಳ ಹಾಗೂ ಪತಿಯ ಮುಂದೆಯೇ ಕರಿಮಣಿಯನ್ನು ತೊಳೆಯುತ್ತಿದ್ದಂತೆಯೇ, ನಾನೇ ತೊಳೆದು ಕೊಡುತ್ತೇನೆಂದು ಹೇಳಿ, ಕರಿಮಣಿ ಸರ ಪಡೆದ ಆ ಯುವಕ ತನ್ನಲ್ಲಿದ್ದ ಪಾತ್ರೆಗೆ ಸ್ವಲ್ಪ ನೀರು ಮತ್ತು ಇನ್ಯಾವುದೋ ದ್ರಾವಣ ಸುರಿದು ಕರಿಮಣಿ ಸರವನ್ನು ಹಾಕಿ ಸ್ವಲ್ಪ ಹೊತ್ತು ತೊಳೆದಿದ್ದಾನೆ.
ಆ ಬಳಿಕ ಮಹಿಳೆಯ ಕೈಗೆ ಅರಶಿನ ಲೇಪಿಸಿದ ಸರವನ್ನು ನೀಡಿದ ಯುವಕ ಅರ್ಧ ಗಂಟೆ ಫ್ಯಾನ್ ಅಡಿಯಲ್ಲಿಟ್ಟು ನಂತರ ತೊಳೆದು ಹಾಕಿದಾಗ ಹೊಳಪು ಬರುತ್ತಿದೆ ಎಂದು ಹೇಳಿ ಮನೆಯವರಿಂದ 20 ರೂ. ಪಡೆದು ಹೊರಟು ಹೋಗಿದ್ದಾನೆ. ಅರ್ಧ ಗಂಟೆಯ ನಂತರ ತೆಗೆದು ನೋಡಿದಾಗ ಕರಿಮಣಿ ಸರ ಬಿಳಿ ಬಣ್ಣಕ್ಕೆ ತಿರುಗಿದ್ದರಿಂದ ಕಂಗಾಲಾದ ಮನೆಯವರು ಅಕ್ಕಸಾಲಿಗರಲ್ಲಿ ಪರಿಶೀಲಿಸಿದಾಗ ಸರದಲ್ಲಿದ್ದ 13 ಗ್ರಾಂನಷ್ಟು ಚಿನ್ನ ಕರಗಿ ಹೋಗಿರುವುದು ಬಯಲಾಗಿದೆ.
ತಕ್ಷಣವೇ ಯುವಕನನ್ನು ಹುಡುಕಾಡಿದ್ದರೂ, ಆ ಹೊತ್ತಿಗಾಗಲೇ ಆತ ಬಸ್ಸನ್ನೇರಿ ನಾಪತ್ತೆಯಾಗಿದ್ದಾನೆ. ಮಹಿಳೆ 20 ರೂ.ನೊಂದಿಗೆ ಚಿನ್ನದ ಈಗಿನ ಮೌಲ್ಯ ಸುಮಾರು 35 ಸಾವಿರದಷ್ಟು ಹಣವನ್ನು ಕಳೆದುಕೊಂಡಿದ್ದಾರೆ.