ಬಂಟ್ವಾಳ: ಕಲ್ಲಡ್ಕ, ಪುಣಚ ಶಾಲೆಗಳಿಗೆ ದೊರಕುತ್ತಿದ್ದ ದೇವಸ್ಥಾನದ ನೆರವು ರದ್ದುಗೊಳಿಸುವ ವಿಚಾರದಲ್ಲಿ ರಾಜಕೀಯ ನಾಟಕ ನಡೆಯುತ್ತಿದೆ ಎಂದು ದಕ್ಷಿಣ ಕನ್ನಡ ಜಿಲ್ಲಾ ಉಸ್ತುವಾರಿ ಸಚಿವ ಬಿ.ರಮಾನಾಥ ರೈ ಹೇಳಿದ್ದಾರೆ.ಬಂಟ್ವಾಳದಲ್ಲಿ ಶುಕ್ರವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಈ ವಿಚಾರದಲ್ಲಿ ತಾನು ಯಾವುದೇ ತಪ್ಪು ಮಾಡಿಲ್ಲ. ಇದೆಲ್ಲವೂ ನಾಟಕ ಎಂದರು.
* ಪ್ರಭಾಕರ ಭಟ್ ವಿರುದ್ಧ ವಾಗ್ದಾಳಿ:
ಆರ್.ಎಸ್.ಎಸ್. ನಾಯಕ ಕಲ್ಲಡ್ಕ ಡಾ. ಪ್ರಭಾಕರ ಭಟ್ ಅವರ ವಿರುದ್ಧ ನೇರ ವಾಗ್ದಾಳಿ ನಡೆಸಿದ ರೈ, ಪುಣಚದ ಸುಬ್ಬಣ್ಣ ಶಾಸ್ತ್ರಿಗಳ ಮೊಮ್ಮಗ ಆರಂಭಿಸಿದ್ದ ಪ್ರೌಢಶಾಲೆಗೆ ಶ್ರೀದೇವಿ ಪ್ರೌಢಶಾಲೆಯವರು ತಕರಾರು ತೆಗೆದಿದ್ದರು. ಈ ಸಂದರ್ಭ ಪ್ರೌಢಶಾಲೆ ಮಾಡಬಾರದು ಎಂದು ನಾನಾ ರೀತಿಯಲ್ಲಿ ಒತ್ತಡ ಹೇರಿದ್ದರು. ಅಂದು ಡಾ. ಭಟ್, ಶಾಸಕಿ ಮಲ್ಲಿಕಾ ಪ್ರಸಾದ್ ಸೇರಿ ಶಾಲೆಯಲ್ಲಿದ್ದ ಮಕ್ಕಳನ್ನು ಊಟದ ತಟ್ಟೆ ಸಹಿತ ಹೊರಹಾಕಿಸಿದ್ದರು. ಶಾಲೆಗೆ ಬೀಗ ಜಡಿಯುವ ಸಂದರ್ಭ ಅನ್ನದ ತಟ್ಟೆ ಎಸೆಯಲಾಗಿತ್ತು. ಪುಣಚದ ಶಾಲೆಯ ಮಕ್ಕಳನ್ನು ಹೊರಹಾಕಿದ್ದು, ರಮಾನಾಥ ರೈ ಅಲ್ಲ. ಕಲ್ಲಡ್ಕ ಶಾಲೆಯ ಮಕ್ಕಳಿಗೆ ದೇವಸ್ಥಾನದಿಂದ ಲಭ್ಯ ನೆರವು ಸ್ಥಗಿತವಾದೊಡನೆ ನನ್ನ ಅನ್ನಕ್ಕೆ ಕನ್ನ ಹಾಕಿದೆ ಎಂದು ಮಕ್ಕಳಿಂದ ಹೇಳಿಸುವ ಪ್ರಭಾಕರ ಭಟ್ಟರು ಪುಣಚದಲ್ಲಿ ಏನು ಮಾಡಿದ್ದಿರಿ ಎಂದು ರೈ ಸವಾಲೆಸೆದರು.
ಮಕ್ಕಳಿಂದ ಖಾಲಿ ತಟ್ಟೆ ಹಿಡಿಯುವಂತೆ ಮಾಡಿ, ಅವರಿಂದ ಭಾಷಣ ಮಾಡಿಸುವುದು ಹಾಗೂ ಇತರರಿಂದ ಭಿಕ್ಷೆ ಬೇಡಿಸುವ ಬದಲು, ಪ್ರಭಾಕರ ಭಟ್ಟರೇ ಭಿಕ್ಷೆ ಬೇಡಬೇಕಿತ್ತು. ಅವರ ಶಾಲೆಯ ಶಿಕ್ಷಕರ ಸಂಬಳಕ್ಕೆ ಸರಕಾರದ ಅನುದಾನ ದೊರಕುತ್ತದೆ. ಸಿನೆಮಾ ನಟ, ನಟಿಯರು, ಜನಾರ್ದನ ರೆಡ್ಡಿಯಂಥ ಉದ್ಯಮಿಗಳಿಂದ ಹಣಕಾಸಿನ ನೆರವು ಬರುತ್ತದೆ. ಹೀಗಿರುವಾಗ ಮಕ್ಕಳನ್ನು ಮುಂದಿಟ್ಟುಕೊಂಡು ತನ್ನ ವಿರುದ್ಧ ಆರೋಪ ಹೊರಿಸುವುದು ಎಷ್ಟು ಸರಿ ಎಂದು ಹೇಳಿದ ರೈ, ನೀವು ನನ್ನ ಅನ್ನಕ್ಕೆ ಕನ್ನ ಹಾಕಿದಿರಿ ಎನ್ನುತ್ತೀರಲ್ಲ, ನೀವು ಏನು ಮಾಡಿದ್ದೀರಿ ಹೈಸ್ಕೂಲುಗಳು ಸರಕಾರಿ ಅನುದಾನದಿಂದ ನಡೆಯುತ್ತಿದ್ದು, ಈಗಲೂ ಬಿಸಿಯೂಟ ಪಡೆಯುವ ಅವಕಾಶ ಇದೆ. ಶಿಕ್ಷಣ ಸಂಸ್ಥೆಯವರು ತಮಗೆ ಸರಕಾರದ ವತಿಯಿಂದ ಬಿಸಿಯೂಟ ಬೇಡ ಎಂದು ಹೇಳಿದರೆ ಏನು ಮಾಡುವುದು ಎಂದು ಪ್ರಶ್ನಿಸಿದರು.
ಕಲ್ಲಡ್ಕ ಶಿಕ್ಷಣ ಸಂಸ್ಥೆಗೆ ಜಮೀನು ನೀಡಿದ್ದು ಅಂದಿನ ಕಾಂಗ್ರೆಸ್ ಸರಕಾರ. ಅಂದು ಆರ್. ಗುಂಡೂರಾವ್ ಮುಖ್ಯಮಂತ್ರಿ ಆಗಿದ್ದ ಸಂದರ್ಭ ಶ್ರೀರಾಮ ವಿದ್ಯಾಕೇಂದ್ರಕ್ಕೆ ಜಮೀನು ಮಂಜೂರು ಮಾಡಲಾಗಿತ್ತು. ಈ ಸಂದರ್ಭ ಯಾವ ತಾರತಮ್ಯವನ್ನೂ ಮಾಡಿರಲಿಲ್ಲ. ಇದು ಡಾ. ಭಟ್ ಅವರಿಗೆ ಮರೆತುಹೋಯಿತೇ ಎಂದು ಪ್ರಶ್ನಿಸಿದ ರೈ, ಈ ಕುರಿತು ಅವರಿಗೆ ಸ್ವಲ್ಪವಾದರೂ ಕೃತಜ್ಞತೆ ಇರಬೇಕಿತ್ತು. ಆದರೆ ಅಂಥ ಮನೋಭಾವ ಅವರಿಗಿಲ್ಲ. ಅವರು ಕೃತಘ್ನರು ಎಂದು ಆರೋಪಿಸಿದರು.ನನ್ನ ಶಾಲೆ ಇರುವುದು ಸರಕಾರಿ ಜಾಗದಲ್ಲಲ್ಲ. ಇವರದ್ದು ಸರಕಾರಿ ಜಾಗದಲ್ಲಿದೆ. ಸರಕಾರದ ನೆರವು ಪಡೆಯಿರಿ ಎಂದು ಬಿಜೆಪಿ ಸಂಸದ ನಳಿನ್ ಕುಮಾರ್ ಕಟೀಲ್ ಹೇಳುತ್ತಾರೆ, ಅಂಥ ಅಕಾರದ ದುರುಪಯೋಗವನ್ನು ನಾನು ಮಾಡಿಲ್ಲ ಎಂದು ರೈ ಸ್ಪಷ್ಟನೆ ನೀಡಿದರು.
ಬಂಟ್ವಾಳ ಬೈಪಾಸ್ ರಸ್ತೆಯನ್ನು ರೀಪೇರಿ ಮಾಡಲಾಗದ ವ್ಯಕ್ತಿ ಇಂದು ನಂಬರ್ ಒನ್ ಸಂಸದರೆನಿಸಿಕೊಳ್ಳುತ್ತಾರೆ. ಹಾಗಾದರೆ ಉಳಿದವರು ಹೇಗಿರಬಹುದು ಎಂದು ಲೇವಡಿ ಮಾಡಿದ ರೈ, ಬಿಜೆಪಿ ರಾಜಕೀಯ ಲಾಭಕ್ಕೋಸ್ಕರ ಹೇಳಿಕೆ ನೀಡುತ್ತಿದೆ ಎಂದರು.ಶರತ್ ಮಡಿವಾಳ ಹತ್ಯೆ ನಿಯೋಜಿತ ಹತ್ಯೆ. ತಾಲೂಕಿನಲ್ಲಿ ನಡೆದ ಎರಡೂ ಕೊಲೆಗಳನ್ನು ಮತೀಯವಾದಿಗಳು ಮಾಡಿದ್ದು ಎಂದು ಮೇಲ್ನೋಟಕ್ಕೆ ಸಾಬೀತಾಗಿದೆ ಎಂದು ರಮಾನಾಥ ರೈ ಹೇಳಿದರು.
ಬಹುಸಂಖ್ಯಾತ, ಅಲ್ಪಸಂಖ್ಯಾತ ಮತೀಯ ಸಂಘಟನೆಗಳು ಸಕ್ರಿಯವಾಗಿವೆ ಎಂದು ಹಿಂದೆಯೇ ಹೇಳಿದ್ದೆ. ತನಿಖೆ ನಡೆದು ಅಪರಾಗಳನ್ನು ಹಿಡಿಯುವಂತೆ ನಾನೂ ಒತ್ತಡ ಹಾಕಿದ್ದೆ. ಈ ಕುರಿತು ದೇವರಲ್ಲೂ ಮನವಿ ಮಾಡಿದ್ದೆ. ಯಾರು ಅಪಪ್ರಚಾರ ಮಾಡುತ್ತಾರೋ ಅವರಿಗೆ ಶಿಕ್ಷೆ ಕೊಡಬೇಕು ಎಂದು ಹೇಳಿದ ರೈ, ತಾಲೂಕಿನಲ್ಲಿ ಭಯಮುಕ್ತ ವಾತಾವರಣ ಸೃಷ್ಟಿ ತನ್ನ ಆದ್ಯತೆ ಎಂದರು. ತಾಲೂಕಿನಲ್ಲಿ ನಡೆದ ಕೃತ್ಯಗಳಿಗೆ ಸಂಬಂಧಿಸಿ ಆರೋಪಿಗಳನ್ನು ಬಂಧಿಸಿದ ಪೊಲೀಸರ ಕಾರ್ಯಕ್ಕೆ ಅವರು ಶ್ಲಾಘನೆ ವ್ಯಕ್ತಪಡಿಸಿದರು.ಗೃಹಸಚಿವರಾಗಿ ನೇಮಕಗೊಳ್ಳುವ ಸಾಧ್ಯತೆ ಕುರಿತು ಪತ್ರಕರ್ತರ ಪ್ರಶ್ನೆಗೆ ಉತ್ತರಿಸಿದ ರೈ, ಕಾದು ನೋಡಿ ಎಂದು ಉತ್ತರಿಸಿದರು. ಬೆಂಗಳೂರಿಗೆ ಹೋಗುತ್ತಿದ್ದೇನೆ ಎಂದಷ್ಟೇ ಉತ್ತರಿಸಿದ ಸಚಿವರು, ಗೃಹಖಾತೆ ವಹಿಸುವ ಸುಳಿವು ನೀಡಿದರು.
ಸುದ್ದಿಗೋಷ್ಠಿಯಲ್ಲಿ ರಾಜ್ಯ ಗೇರು ಅಭಿವೃದ್ಧಿ ನಿಗಮದ ಅಧ್ಯಕ್ಷ ಬಿ.ಎಚ್.ಖಾದರ್, ಬಂಟ್ವಾಳ ತಾಲೂಕು ಪಂಚಾಯತ್ ಉಪಾಧ್ಯಕ್ಷ ಅಬ್ಬಾಸ್ ಅಲಿ, ಪುರಸಭಾಧ್ಯಕ್ಷ ರಾಮಕೃಷ್ಣ ಆಳ್ವ, ಉಪಾಧ್ಯಕ್ಷ ಮುಹಮ್ಮದ್ ನಂದರಬೆಟ್ಟು, ತಾಲೂಕು ಅಕ್ರಮ ಸಕ್ರಮ ಸಮಿತಿ ಅಧ್ಯಕ್ಷ ಮಾಯಿಲಪ್ಪ ಸಾಲ್ಯಾನ್, ಎಪಿಎಂಸಿ ಅಧ್ಯಕ್ಷ ಪದ್ಮನಾಭ ನರಿಂಗಾನ, ಯೋಜನಾ ಪ್ರಾಧಿಕಾರದ ಅಧ್ಯಕ್ಷ ಸದಾಶಿವ ಬಂಗೇರ, ಜಿಲ್ಲಾ ಪಂಚಾಯತ್ ಸದಸ್ಯರಾದ ಚಂದ್ರಪ್ರಕಾಶ್ ಶೆಟ್ಟಿ, ಎಂ.ಎಸ್.ಮುಹಮ್ಮದ್, ಪದ್ಮಶೇಖರ್ ಜೈನ್, ಮಂಜುಲಾ ಮಾವೆ, ತಾಪಂ ಸದಸ್ಯ ಸಂಜೀಪ ಪೂಜಾರಿ, ಯುವ ಕಾಂಗ್ರೆಸ್ ಅಧ್ಯಕ್ಷ ಪ್ರಶಾಂತ್ ಕುಲಾಲ್, ಪ್ರಮುಖರಾದ ರಾಜೇಶ್ ಬಾಳೆಕಲ್ಲು, ಪದ್ಮನಾಭ ಮೊದಲಾದವರು ಉಪಸ್ಥಿತರಿದ್ದರು.