ಮಂಗಳೂರು: ರಸ್ತೆ ಅಪಘಾತದಂಥ ತುರ್ತು ಸಂದರ್ಭದಲ್ಲಿ ಪ್ರಥಮ ಚಿಕಿತ್ಸೆ ನೀಡಲು ಮಂಗಳೂರು ಮಹಾನಗರ ಪಾಲಿಕೆ ಹಾಗೂ ಉಳ್ಳಾಲಕ್ಕೆ ತಲಾ ಒಂದು ಬೈಕ್ ಆ್ಯಂಬುಲೆನ್ಸ್ ಸೇವೆಗೆ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವ ಯು.ಟಿ.ಖಾದರ್ ನಗರದ ಸರ್ಕ್ಯೂಟ್ ಹೌಸ್‌ನಲ್ಲಿ ಮಂಗಳವಾರ ಚಾಲನೆ ನೀಡಿದರು.
ಬೈಕ್ ಆ್ಯಂಬುಲೆನ್ಸ್ ಚಲಾಯಿಸಿ ಚಾಲನೆ ನೀಡಿದ ಸಚಿವರು, ಬಳಿಕ ಸುದ್ದಿಗಾರರ ಜತೆ ಮಾತನಾಡಿ, ಆಕ್ಸಿಜನ್ ಸೇರಿದಂತೆ ತುರ್ತು ಚಿಕಿತ್ಸೆ ಸಾಧನಗಳನ್ನು ಒಳಗೊಂಡ ಬೈಕ್ ಆ್ಯಂಬುಲೆನ್ಸ್, ಅಪಘಾತ ಸಂಭವಿಸಿದ ಗರಿಷ್ಠ 10 ನಿಮಿಷಗಳೊಳಗೆ ಘಟನಾ ಸ್ಥಳಕ್ಕೆ ತಲುಪಲಿದೆ ಎಂದರು.
ರಾಜ್ಯದಲ್ಲಿ 32 ಬೈಕ್ ಆ್ಯಂಬುಲೆನ್ಸ್‌ಗಳನ್ನು ಬಿಡುಗಡೆ ಮಾಡಿದ್ದು, ಅದರಲ್ಲಿ 20 ಬೆಂಗಳೂರಿನಲ್ಲಿ ಹಾಗೂ 12 ರಾಜ್ಯದ ಪಾಲಿಕೆ ವ್ಯಾಪ್ತಿಯಲ್ಲಿ ಕಾರ್ಯಾಚರಿಸಲಿವೆ. ಅದರಂತೆ ಒಂದು ಮಂಗಳೂರು ನಗರಕ್ಕೆ ಹಾಗೂ ಸಣ್ಣ ನಗರಗಳ ಪೈಕಿ, ಪ್ರಾಯೋಗಿಕ ನೆಲೆಯಲ್ಲಿ ಉಳ್ಳಾಲಕ್ಕೆ ಈ ಸೇವೆ ಕಲ್ಪಿಸಲಾಗುತ್ತಿದೆ. ಮುಂದಿನ ಆರು ತಿಂಗಳಲ್ಲಿ ಈ ಸೇವೆಯ ಉತ್ಕೃಷ್ಟತೆಯನ್ನು ಪರಿಗಣಿಸಿ ಯೋಜನೆಯನ್ನು ವಿಸ್ತರಿಸುವ ಬಗ್ಗೆ ಚಿಂತಿಸಲಾಗುವುದು. ಬೆಂಗಳೂರಿನಲ್ಲಿ ಈಗಾಗಲೇ ಆರಂಭಗೊಂಡಿರುವ ಈ ಸೇವೆಯ ಬಗ್ಗೆ ದೇಶ ವಿದೇಶಗಳಿಂದಲೂ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ ಎಂದು ಖಾದರ್ ಹೇಳಿದರು.
ಬೈಕ್‌ನಲ್ಲಿ ತರಬೇತು ಹೊಂದಿದ ಪ್ಯಾರಾ ಮೆಡಿಕಲ್ ಸಿಬ್ಬಂದಿಯೊಬ್ಬರು ಮಾತ್ರ ಕಾರ್ಯನಿರ್ವಹಿಸಲಿದ್ದಾರೆ. ಈ ಬೈಕ್ ತುರ್ತು ಚಿಕಿತ್ಸೆ ಸೇವೆಗಾಗಿ ವಿಶೇಷವಾಗಿಯೇ ಆಕ್ಸಿಜನ್ ಕಿಟ್ ಅಳವಡಿಸಲಾಗಿದೆ. ಒಂದರಲ್ಲಿ 50 ಜೀವ ರಕ್ಷಕ ಕಿಟ್‌ಗಳಿರುತ್ತವೆ. ವಿಶೇಷವಾಗಿ ವಿನ್ಯಾಸ ಮಾಡಿದ ಒಂದು ಬೈಕ್ ಆ್ಯಂಬುಲೆನ್ಸ್‌ನ ವೆಚ್ಚ ಸುಮಾರು 2.5 ಲಕ್ಷ ರೂ. ಎಂದು ಅವರು ವಿವರಿಸಿದರು.
ಎಂಡೋ ಪೀಡಿತರಿಗೆ ಬಾಕಿ ಮಾಶಾಸನ ನೀಡುವ ಸಂಬಂಧ ಕಂದಾಯ ಇಲಾಖೆ ಜತೆಗೆ ಶೀಘ್ರದಲ್ಲಿ ಮಾತನಾಡಿ ಪೂರಕ ಕ್ರಮ ಕೈಗೊಳ್ಳಲಾಗುವುದು ಎಂದು ಅವರು ಹೇಳಿದರು.
108 ಆ್ಯಂಬುಲೆನ್ಸ್ ಸೇವೆ ಜತೆ ಸೇರಿಕೊಂಡು ಬೈಕ್ ಆ್ಯಂಬುಲೆನ್ಸ್ ಕಾರ್ಯಾಚರಿಸಲಿದೆ. ಅಪಘಾತ ವಲಯ ಎಂದು ಗುರುತಿಸಿರುವ ಪ್ರದೇಶದಲ್ಲಿ 108ರ ನಿರ್ದೇಶನದ ಮೇರೆಗೆ ಬೈಕ್‌ಗಳ ನಿಲುಗಡೆ ಮಾಡಲಾಗುತ್ತದೆ. ಅಪಘಾತ ಸಂದರ್ಭ ಕರೆ ಬಂದಾಗ ಮೊದಲು ಬೈಕ್ ಹಾಗೂ ಹಿಂದೆಯೇ 108 ವಾಹನ ಕೂಡಾ ತಲುಪಲಿದೆ. ಸಿಬ್ಬಂದಿಯು ತುರ್ತು ಚಿಕಿತ್ಸೆ ಒದಗಿಸುವ ಮೂಲಕ ಮುಂದಿನ ಚಿಕಿತ್ಸೆಗಾಗಿ ಅಪಘಾತಕ್ಕೊಳಗಾದವರನ್ನು ಆಸ್ಪತ್ರೆಗೆ ಸಾಗಿಸುವಲ್ಲಿ ನೆರವಾಗಲಿದ್ದಾರೆ ಎಂದು ಸಚಿವರು ಹೇಳಿದರು.
ಮೇಯರ್ ಜೆಸಿಂತಾ ವಿಜಯಾ ಆಲ್ಫ್ರೆಡ್, ಉಪಮೇಯರ್ ಪುರುಷೋತ್ತಮ ಚಿತ್ರಾಪುರ, ಜಿಲ್ಲಾ ಆರೋಗ್ಯಾಧಿಕಾರಿ ಡಾ.ರಾಮಕೃಷ್ಣ ರಾವ್, ವೆನ್‌ಲಾಕ್ ಆಸ್ಪತ್ರೆ ಶಸ್ತ್ರಚಿಕಿತ್ಸಕಿ ಡಾ.ಎಚ್.ಆರ್.ರಾಜೇಶ್ವರಿ ದೇವಿ, ಡಾ.ಕಿಶೋರ್ ಮತ್ತಿತರರು ಪತ್ರಿಕಾಗೋಷ್ಠಿಯಲ್ಲಿ ಉಪಸ್ಥಿತರಿದ್ದರು.