ತುಳುನಾಡಿನ ಆಚರಣೆ ವಿಚಾರ, ಸಂಸ್ಕೃತಿ, ಸಂಪ್ರದಾಯವು ಹೇಗೆ ವಿಭಿನ್ನವಾಗಿದೆಯೋ ಅದೇ ರೀತಿ ಇಲ್ಲಿನ ಆಹಾರ ಪದ್ಧತಿಯಲ್ಲಿ ವಿಶೇಷತೆಯನ್ನು ಕಾಣಬಹುದು. ಮಳೆಗಾಲದಲ್ಲಿ ವಿಶೇಷವಾದ ಅಡುಗೆ ಘಮವು ಕರಾವಳಿಗರ ಮನೆಯ ತುಂಬಾ ಹಬ್ಬುತ್ತದೆ. ಈ ಆಷಾಢ ಅಮಾವಾಸ್ಯೆಯಂದು ಕಷಾಯ ಕುಡಿದ ಬಳಿಕ ಸೇವಿಸುವ ಆಹಾರವೇ ಈ ಮೆಂತ್ಯೆ ಗಂಜಿ. ಅದಲ್ಲದೇ ಹೆಣ್ಣು ಋತುಮತಿಯದಾಗ, ಬಾಣಂತಿಯರಿಗೆ ಕೂಡ ಈ ತಿನಿಸನ್ನು ಮಾಡಿಕೊಡುತ್ತಾರೆ. ದೇಹವು ಉಷ್ಣವಾಗಿದ್ದರೆ ಈ ಆಹಾರವು ದೇಹವನ್ನು ತಂಪಾಗಿಸುತ್ತದೆ. ಹೀಗಾಗಿ ಮನೆಯಲ್ಲಿರುವ ಕೆಲವೇ ಕೆಲವು ವಸ್ತುಗಳಿಂದ ಈ ಮೆಂತ್ಯೆ ಗಂಜಿಯನ್ನು ಮಾಡಿ ಸವಿಯಬಹುದು.

ಮೆಂತ್ಯೆ ಗಂಜಿ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ಒಂದು ಕಪ್ ಅಕ್ಕಿ
• ಕಾಲು ಕಪ್ ಮೆಂತ್ಯೆ
• ಒಂದು ಕಪ್ ತುರಿದ ಬೆಲ್ಲ
• ತೆಂಗಿನಕಾಯಿ ತುರಿ
• ತುಪ್ಪ
• ರುಚಿಗೆ ತಕ್ಕಷ್ಟು ಉಪ್ಪು

ಮೆಂತ್ಯೆ ಗಂಜಿ ತಯಾರಿಸುವ ವಿಧಾನ

• ಮೊದಲಿಗೆ ಮೆಂತ್ಯ ಬೀಜಗಳನ್ನು ತೊಳೆದು ರಾತ್ರಿ ನೆನೆಸಿಡಬೇಕು.
• ಈ ನೆನೆಸಿದ ಮೆಂತ್ಯ ಬೀಜಗಳ ಜೊತೆಗೆ ಅಕ್ಕಿ ಮತ್ತು 5 ಕಪ್ ನೀರು ಹಾಕಿ ಕುಕ್ಕರ್ ನಲ್ಲಿ ಎರಡರಿಂದ ಮೂರು ಸೀಟಿ ಬರುವವರೆಗೂ ಬೇಯಿಸಿಕೊಳ್ಳಬೇಕು.
• ತುರಿದ ತೆಂಗಿನಕಾಯಿಗೆ ನೀರನ್ನು ಸೇರಿಸಿ, ಮಿಕ್ಸಿಯಲ್ಲಿ ರುಬ್ಬಿಕೊಂಡು ಹಾಲನ್ನು ತೆಗೆದು ಇಟ್ಟುಕೊಳ್ಳಬೇಕು.
• ಬೇಯಿಸಿದ ಅಕ್ಕಿ ಮತ್ತು ಮೆಂತ್ಯೆ ಮಿಶ್ರಣಕ್ಕೆ, ಉಪ್ಪು ಬೆಲ್ಲ ಮತ್ತು ತೆಂಗಿನ ಹಾಲು ಸೇರಿಸಿ ಚೆನ್ನಾಗಿ ಕುದಿಸಿಕೊಳ್ಳಬೇಕು.
• ದಪ್ಪ ಬರುವವರೆಗೂ ಬೇಯಿಸಿದರೆ, ಘಮ್ ಎನ್ನುವ ಮೆಂತ್ಯೆ ಗಂಜಿ ಸವಿಯಲು ಸಿದ್ದವಾಗಿರುತ್ತದೆ.
• ಇದಕ್ಕೆ ತುಪ್ಪವನ್ನು ಸೇರಿಸಿ ಸವಿದರೆ ರುಚಿಯೇ ಅದ್ಭುತವಾಗಿರುತ್ತದೆ.