ಜೀವ ಬೆದರಿಕೆಯೊಡ್ಡಿ ಯುವತಿ ಅತ್ಯಾಚಾರ: ಆರೋಪಿಯ ಸೆರೆ

ಮೂಡುಬಿದರೆ: ಪಡುಮಾನರ್ಾಡು ಗ್ರಾಮದ ಮುನ್ನೇರು ಎಂಬಲ್ಲಿ 19ರ ಹರೆಯದ ಯುವತಿಯೊಬ್ಬಳ ಮೇಲೆ ನಿರಂತರ ಅತ್ಯಾಚಾರ ನಡೆಸಿದ್ದಾನೆ ಎನ್ನಲಾದ ಆರೋಪಿಯನ್ನು ಮೂಡುಬಿದರೆ ಪೊಲೀಸರು ಬುಧವಾರ ಬಂಧಿಸಿದ್ದಾರೆ.

ಪಡುಮಾನರ್ಾಡು ಗ್ರಾಮದ ಮುನ್ನೇರು ನವೋದಯ ನಿವಾಸದ ದಯಾನಂದ ಹೆಗ್ಡೆ (45 ವ) ಬಂಧಿತ ಆರೋಪಿ. ದಯಾನಂದ ಹೆಗ್ಡೆ ಕಳೆದ ಜುಲೈ ಮೊದಲ ವಾರದ ಒಂದು ದಿನ ಯುವತಿಯು ಮನೆ ಸಮೀಪದ ಕೆರೆಯಲ್ಲಿ ಬಟ್ಟೆ ಒಗೆಯುತ್ತಿದ್ದಾಗ ಏಕಾಏಕಿ ಅಲ್ಲಿಗೆ ನುಗ್ಗಿ ಆಕೆಯನ್ನು ಬಲಾತ್ಕಾರವಾಗಿ ಹಿಡಿದೆಳೆದಿದ್ದು ಬೊಬ್ಬೆ ಹೊಡೆದಾಗ ಕೊಲೆಮಾಡುವುದಾಗಿ ಬೆದರಿಕೆಯೊಡ್ಡಿ ಅಲ್ಲಿಂದ ಕಾಡಿಗೆ ಎಳೆದೊಯ್ದು ಅತ್ಯಾಚಾರ ವೆಸಗಿದ್ದ.

ಹೀಗೆ ಹಲವು ಬಾರಿ ಅತ್ಯಾಚಾರ ನಡೆಸಿದ್ದರೂ ಮುಗ್ಧ ಯುವತಿ ಜೀವ ಬೆದರಿಕೆಯ ಭಯದಲ್ಲಿ ಮನೆಯವರಿಗೆ ವಿಷಯ ತಿಳಿಸಿರಲಿಲ್ಲ. ಕಳೆದ ಅಕ್ಟೋಬರ್ 31ರಂದು ಬೆಳಿಗ್ಗೆ 10 ಗಂಟೆಯ ಸುಮಾರಿಗೆ ಯುವತಿ ಬೀಡಿ ಬ್ರಾಂಚ್ಗೆ ಹೋಗುತ್ತಿದ್ದಾಗ ಕಾಡುದಾರಿಯಲ್ಲಿ ಆಕೆಯನ್ನು ಅಡ್ಡಗಟ್ಟಿ ಕಾಡಿನೊಳಗೆ ಎಳೆದೊಯ್ದು ಮತ್ತೆ ಅತ್ಯಾಚಾರ ನಡೆಸಿದ್ದ.

ಕಾಡಿಗೆ ಕಟ್ಟಿಗೆ ತರಲೆಂದು ಹೋಗಿದ್ದವರು ಈ ಘಟನೆಯನ್ನು ಕಂಡು ಯುವತಿಯ ಮನೆಯವರಿಗೆ ವಿಷಯ ತಿಳಿಸಿದ್ದು ಪ್ರಕರಣ ಬೆಳಕಿಗೆ ಬಂದಿದೆ. ಬುಧವಾರ ಯುವತಿ ಮೂಡುಬಿದಿರೆ ಪೊಲೀಸರಿಗೆ ದೂರು ನೀಡಿದ್ದು ವೃತ್ತ ನಿರೀಕ್ಷಕ ಅನಂತಪದ್ಮನಾಭ ಪ್ರಕರಣ ದಾಖಲಿಸಿ ತನಿಖೆ ನಡೆಸುತ್ತಿದ್ದಾರೆ. ಆರೋಪಿ ದಯಾನಂದ ಹೆಗ್ಡೆ ಬನ್ನಡ್ಕ ಹಾಲು ಉತ್ಪಾಧಕರ ಸೊಸೈಟಿಯಲ್ಲಿ ಹಾಲು ಖರೀದಿಸುವ ಕೆಲಸಮಾಡುತ್ತಿದ್ದು ಪತ್ನಿ ಮತ್ತು ಮದುವೆ ವಯಸ್ಸಿನ ಪುತ್ರಿ ಇದ್ದಾರೆ.