ಮಂಗಳೂರು: ಈಗಲೂ ಕಾರು ಚಲಾಯಿಸುವ ಮೂಲಕ ಎಲ್ಲರಲ್ಲೂ ನಿಬ್ಬೆರಗು ಮೂಡಿಸುತ್ತಿರು ರಾಬರ್ಟ್ ಮೈಕೆಲ್ ಡಿಸೋಜ ಅವರು ಗುರುವಾರ 100ನೇ ಹುಟ್ಟುಹಬ್ಬವನ್ನು ಆಚರಿಸಿಕೊಂಡರು. ಮುಂಜಾನೆ ಹ್ಯಾಟ್ಹಿಲ್ನ ಮನೆ ಪರಿಸರದ ಜನರಿಂದ ಪ್ರೀತಿಯ ಬತರ್್ ಡೇ ಶುಭಾಶಯದಲ್ಲಿ ಮುಳುಗಿಹೋದ ಅಜ್ಜ ಸಂಜೆ ನಡೆದ ಸಾರ್ವಜನಿಕ ಹುಟ್ಟುಹಬ್ಬಕ್ಕೆ ಬರಲೇ ಇಲ್ಲ. ಇದಕ್ಕೆ ಕಾರಣ: ಅವರು ಹುಟ್ಟು ಹಬ್ಬದ ಸಂಭ್ರಮದಲ್ಲಿ ಇಡೀ ದಿನ ಕಾರು ಓಡಿಸಿದ್ದರಿಂದ ಸಂಜೆ ಹೊತ್ತಿಗೆ ಕಾಡಿದ ಜ್ವರ!
ಬೆಳಗ್ಗೆ ಯೇ ಅವರು ವಾಸಿಸುವ ಲಾಲ್ಭಾಗ್ ಸಮೀಪದ ವಾಸಿಗಳು ಅವರಿಗೆ ಮಾಲೆ ಹಾಕಿ, ಕೇಕ್ ತಿನ್ನಿಸಿ ಸಂಭ್ರಮಿಸಿದ್ದರು. ಅವರಿಗೆ ಸಿಹಿ ತಿಂಡಿ ತಿನ್ನಿಸಿ, ಉಡುಗೊರೆಗಳನ್ನು ನೀಡಿದ್ದರು. ಸಂಜೆ ನಗರದ ಕೆನರಾ ಕಾಲೇಜಿನಲ್ಲಿ ಅವರ ಹಿತೈಷಿಗಳು ಹುಟ್ಟುಹಬ್ಬ ಕಾರ್ಯಕ್ರಮ ಆಯೋಜಿಸಿದ್ದರು.
ಸಂಜೆಯ ಕಾರ್ಯಕ್ರಮದಲ್ಲಿ ಹಿರಿಯ ಕಿರಿಯರು ಸೇರಿದಂತೆ ಅಲ್ಲಿ ಹಲವು ಮಂದಿ ಸೇರಿ 100ರ ಅಜ್ಜನ ಕಾಣುವ ತವಕದಲ್ಲಿದ್ದರು. ಹೆಚ್ಚಿನವರು ಕೇಕ್, ಹೂ ಸಹಿತ ಉಡುಗೊರೆಗಳನ್ನು ತಂದಿದ್ದರು. ಆದರೆ ಅಜ್ಜ ಮಾತ್ರ ಅಲ್ಲಿಗೆ ಬರಲಿಲ್ಲ. ಕಾರಣ ಕೇಳಿದರೆ ಅವರು ಜ್ವರದಿಂದ ಮಲಗಿದ್ದರು.
ಬೆಳಗ್ಗೆ 100ನೇ ಹುಟ್ಟುಹಬ್ಬವನ್ನು ಸಂಭ್ರಮದಿಂದ ಆಚರಿಸಿ ಹುಮ್ಮಸಿನಲ್ಲಿದ್ದ ಅವರು, ಎಂದಿನಂತೆ ಕಾರು ಚಲಾಯಿಸುತ್ತಾ ಮಂಗಳೂರು ನಗರ ಸುತ್ತಾಡಿಕೊಂಡು ಬಂದಿದ್ದರು. ಸುತ್ತಾಟದಲ್ಲಿ ಮಧ್ಯಾಹ್ನದ ಊಟವನ್ನೂ ಮರೆತಿದ್ದರು. ಈ ಮಧ್ಯೆ ಹತ್ತಾರು ದೂರವಾಣಿ ಕರೆಗಳನ್ನು ಸ್ವೀಕರಿಸಿ, ಶುಭಾಶಯಕ್ಕೆ ಉತ್ತರಿಸಿ ಸುಸ್ತಾಗಿದ್ದರು.
ಇಂಜೆಕ್ಷನ್ ಬೇಡವೆಂದರು: ನಾಲ್ಕು ಗಂಟೆ ವೇಳೆ ಮನೆಗೆ ಬಂದಿದ್ದ ಅವರು, ತೀವ್ರ ಜ್ವರ ಬಾಧೆಯಿಂದ ಬಳಲುತ್ತಿದ್ದರು. ಇದನ್ನು ಕಂಡ ಅವರ ಹಿತೈಷಿಗಳು ತಕ್ಷಣ ವೈದ್ಯರನ್ನು ಮನೆಗೆ ಕರೆಸಿದರು. ತಪಾಸಣೆ ನಡೆಸಿದ ವೈದ್ಯರು, ಒಂದು ಇಂಜೆಕ್ಷನ್ ತೆಗೆದುಕೊಂಡರೆ ಜ್ವರ ಕಡಿಮೆಯಾಗಿ ಹುಟ್ಟುಹಬ್ಬ ಸಮಾರಂಭದಲ್ಲಿ ಭಾಗವಹಿಸಬಹುದು ಎಂದು ಹೇಳಿದರು. ಜೀವಮಾನದಲ್ಲಿ ಎಂದೂ ಚುಚ್ಚುಮದ್ದು ತೆಗೆದುಕೊಳ್ಳದ ಅವರು, ಇಂದು ಕೂಡಾ ಅದನ್ನು ತೆಗೆದುಕೊಳ್ಳಲು ನಿರಾಕರಿಸಿದರು. ಹಾಗಾಗಿ ಯಾರೂ ಬಲವಂತ ಮಾಡಲು ಹೋಗಲಿಲ್ಲ.
ಜ್ವರದ ನಡುವೆಯೂ ಹುಟ್ಟುಹಬ್ಬ ಸಮಾರಂಭಕ್ಕೆ ಬರುವ ತವಕದಲ್ಲಿದ್ದರೂ, ವೈದ್ಯರ ಸೂಚನೆಯಂತೆ ವಿಶ್ರಾಂತಿಯಲ್ಲಿದ್ದರು.
ಅಣ್ಣನ ಮಗಳಿಗೆ ಗೌರವ: ನಗರದ ಕೆನರಾ ಕಾಲೇಜಿನಲ್ಲಿ ಆಯೋಜಿಸಿದ್ದ ಕಾರ್ಯಕ್ರಮಕ್ಕೆ ಅವರು ಬಾರದೆ ಇದ್ದುದರಿಂದ ಅವರ ಪ್ರತಿನಿಧಿಯಾಗಿ ಅಣ್ಣನ ಮಗಳು ರೆಜಿನಾ ಮತ್ತು ಮೊಮ್ಮಗಳು ಕೇಕ್ ಕತ್ತರಿಸಿ, ಹುಟ್ಟುಹಬ್ಬ ಆಚರಿಸಲಾಯಿತು. ಅವರ ಅನುಪಸ್ಥಿತಿಯಲ್ಲಿ ನಡೆದ ಹುಟ್ಟುಹಬ್ಬದಲ್ಲಿ ಜಾತಿ, ಮತ, ಧರ್ಮದ ಅಂತರವಿಲ್ಲದೆ, ಹಲವರು ಸೇರಿದ್ದರು.
ವಾಸುದೇವ ಉಚ್ಚಿಲ್ ಕಾರ್ಯಕ್ರಮ ಸಂಯೋಜಕರಾಗಿದ್ದರು. ಪ್ರೊ.ನರೇಂದ್ರ ನಾಯಕ್ ಪ್ರಾಸ್ತಾವಿಕ ಮಾತನಾಡಿದರು. ಹಲವು ಮಂದಿ ಅಭಿಮಾನಿಗಳು ಮೈಕಲ್ ಅವರ ಬಗ್ಗೆ ಮಾತನಾಡಿದರು.