ಕೈಕಂಬ : ಕಳೆದೆರಡು ದಿನಗಳಿಂದ ಎಡೆಬಿಡದೆ ಸುರಿಯುತ್ತಿರುವ ಭಾರೀ ಮಳೆಗೆ ಗುರುಪುರದಲ್ಲಿ ಉಕ್ಕೇರಿ ಹರಿಯುತ್ತಿರುವ ಫಲ್ಗುಣಿ ನದಿ ಪ್ರವಾಹದಿಂದ ತಗ್ಗು ಪ್ರದೇಶದಲ್ಲಿ ಆತಂಕದ ಸ್ಥಿತಿ ಉಂಟಾಗಿದ್ದರೆ, ಮನೆಗಳಿಗೆ ಭಾರೀ ಅಪಾಯ ಸಂಭವಿಸಿದೆ.
ಮೂಡುಶೆಡ್ಡೆ : ಪ್ರವಾಹಕ್ಕೆಭತ್ತದ ಬೆಳೆ ಮುಳುಗಡೆ
ಮೂಡುಶೆಡ್ಡೆ ಭಾಗದಲ್ಲಿ ಫಲ್ಗುಣಿ ನದಿ ಉಕ್ಕೇರಿ ಹರಿಯುತ್ತಿದ್ದು, ಭಾರೀ ಪ್ರಮಾಣದ ಭತ್ತದ ಬೆಳೆ ಮುಳುಗಡೆಯಾಗಿದೆ. ಕೃಷಿಕ ರಮಾನಾಥ ಅತ್ತರ್(ಚಿತ್ತಣ್ಣ) ಐದು ಎಕ್ರೆ ಗದ್ದೆಯಲ್ಲಿ ಬೆಳೆದ `ಎಣೆಲ್’ ಭತ್ತದ ಕೃಷಿ ಪ್ರವಾಹದಿಂದ ಸಂಪೂರ್ಣ ಜಲಾವೃತವಾಗಿ, ಬೆಳೆ ನಷ್ಟವಾಗಿದೆ.
“ತೆನೆಯಾಗಿರುವ ಭತ್ತದ ಬೆಳೆ ಮುಳುಗಡೆಯಾಗಿರುವುದರಿಂದ ಇನ್ನಿದು ಕೊಳೆತು ಹೋಗುತ್ತದೆ. ಇದರಿಂದ ಇದುವರೆಗಿನ ಕರ್ಚುವೆಚ್ಚ(ಕೂಲಿ, ಬೇಲಿ, ಬೀಜ, ಗೊಬ್ಬರ) ಅಂದಾಜಿಸಿದರೆ ಸುಮಾರು ಒಂದು ಲಕ್ಷ ರೂವರೆಗೆ ನಷ್ಟವಾಗಲಿದೆ” ಎಂದು ಚಿತ್ತಣ್ಣ ಹೇಳಿದರು.
ಗುರುಪುರ ಕುಕ್ಕುದಕಟ್ಟೆಯಲ್ಲಿ ಭತ್ತದ ನೇಜಿ ಪ್ರವಾಹದಲ್ಲಿ ಹರಿದು ಹೋಗಿದ್ದು, ಕೆಲವರು ಈಜಿ ಒಂದಷ್ಟು ನೇಜಿ ಹಿಡಿದಿದ್ದಾರೆ. ಇಲ್ಲಿನ ತಗ್ಗುಪ್ರದೇಶದಲ್ಲೂ ಪ್ರವಾಹ ಭೀತಿ ಉಂಟಾಗಿದೆ.