ಇಂಚಿಯಾನ್: 17ನೇ ಏಷ್ಯನ್ ಗೇಮ್ಸ್ನ ಬಿಲ್ಗಾರಿಕೆ ಸ್ಪರ್ಧೆಯಲ್ಲಿ ಭಾರತ ಪುರುಷರ ತಂಡ ಬಂಗಾರಕ್ಕೆ ಗುರಿಯಿಡುವ ಮೂಲಕ ಶನಿವಾರ ಭಾರತೀಯ ಪಾಳಯಕ್ಕೆ ಎರಡನೇ ಚಿನ್ನದ ಗರಿಯನ್ನು ಸೇರಿಸಿತು.
ಅದೇ ವೇಳೆ ಭಾರತದ ಮಹಿಳೆಯರ ಬಿಲ್ಗಾರಿಕೆ ತಂಡ ಇರಾನ್ಗೆ ಮಣ್ಣು ಮುಕ್ಕಿಸುವ ಮೂಲಕ ಕಂಚಿನ ಪದಕವನ್ನು ಸಂಪಾದಿಸಿತು.
ದೇಶದ ಹೆಮ್ಮೆಯ ಬಿಲ್ಗಾರರಾದ ಅಭಿಷೇಕ್ ವರ್ಮಾ ,ರಜತ್ ಚೌಹಾಣ್ ಮತ್ತು ಸಂದೀಪ್ ಕುಮಾರ್ ಅವರಿದ್ದ ತ್ರಿವಳಿ ಪ್ರತಿಭೆಗಳ ತಂಡ, ಪ್ರಬಲ ಪ್ರತಿಸ್ಪರ್ಧಿಯಾಗಿದ್ದ ದಕ್ಷಿಣ ಕೊರಿಯಾ ಕೋರಿಯಾವನ್ನು 227-225 ಅಂಕಗಳ ಅಂತರದಿಂದ ಮಣಿಸಿ ರೋಮಾಂಚಕ ಜಯ ಸಾಧಿಸಿತು. ಆ ಮೂಲಕ ಏಷ್ಯಾಡ್ನ ಎಂಟನೇ ದಿನದಲ್ಲಿ ಭಾರತ ಎರಡನೇ ಚಿನ್ನದ ಪದಕ ದಾಖಲಿಸಿಕೊಂಡು ಪದಕ ಪಟ್ಟಿಯಲ್ಲಿ ಒಂದಿಷ್ಟು ಏರಿಕೆಯನ್ನು ದಾಖಲಿಸಿತು.
ಸದ್ಯ ಪದಕ ಪಟ್ಟಿಯಲ್ಲಿ ಭಾರತ 11ನೇ ಸ್ಥಾನಕ್ಕೇರಿದ್ದು 2 ಚಿನ್ನ, 2 ಬೆಳ್ಳಿ ಹಾಗೂ 16 ಕಂಚಿನ ಪದಕಗಳನ್ನು ಸಂಪಾದಿಸಿದೆ. ಆ ಮೂಲಕ ಒಟ್ಟು 20 ಪದಕಗಳನ್ನು ಗೆಲ್ಲುವಲ್ಲಿ ಭಾರತ ಯಶಸ್ವಿಯಾಗಿದೆ. ಆದರೆ ಅಗ್ರ ಸ್ಥಾನದಲ್ಲಿರುವ ಚೀನಾ 95 ಚಿನ್ನ, 52 ಬೆಳ್ಳಿ, 39 ಕಂಚುಗಳೊಂದಿಗೆ 186 ಪದಕಗಳನ್ನು ಗಳಿಸಿದೆ. ಎರಡನೇ ಸ್ಥಾನದಲ್ಲಿರುವ ಕೊರಿಯಾ 110 ಪದಕಗಳನ್ನೂ, ಮೂರನೇ ಸ್ಥಾನದಲ್ಲಿರುವ ಜಪಾನ್ 108 ಪದಕಗಳನ್ನೂ ಪಡೆದು ಭಾರತಕ್ಕೆ ಬಲು ಎತ್ತರದಲ್ಲಿದೆ.