ಇಂಚೇನ್ (ದ.ಕೊರಿಯಾ): 17ನೇ ಏಷ್ಯಾನ್ ಗೇಮ್ಸ್’ನಲ್ಲಿ ಭಾರತ ಹಾಕಿ ಪಂದ್ಯಾಟದಲ್ಲಿ ಪಾಕಿಸ್ತಾನವನ್ನು ಬಗ್ಗುಬಡಿದಿದ್ದು 16 ವರ್ಷಗಳ ಬಳಿಕ ಏಷ್ಯನ್ ಗೇಮ್ಸ್ ನಲ್ಲಿ ಸ್ವರ್ಣ ಪದಕವನ್ನು ತನ್ನ ಮುಡಿಗೇರಿಸಿತು. ಪಾಕ್ ತಂಡವನ್ನು ಹೀನಾಯವಾಗಿ ಸೋಲಿಸುವ ಮೂಲಕ ಭಾರತ 2016ರ ರಿಯೋ ಒಲಂಪಿಕ್ಸ್ ಅರ್ಹತೆ ಪಡೆದಿರುವುದು ಪಾಕಿಸ್ತಾನಕ್ಕೆ ನುಂಗಲಾರದ ತುತ್ತಾಗಿ ಪರಿಣಮಿಸಿದೆ.
ಕೇವಲ ನಾಲ್ಕನೇ ನಿಮಿಷದಲ್ಲಿ ಗೋಲ್ ಹೊಡೆಯುವ ಮೂಲಕ ಮೊಹ್ಮದ್ ರಿಜ್ವಾನ್ ಒತ್ತಡ ಹೇರಿದರು. ಎರಡನೇ ಕ್ವಾರ್ಟರ್’ನಲ್ಲಿ ಭಾರತದ ಕೊತಾಜಿತ್ ಸಿಂಗ್ 27ನೇ ನಿಮಿಷದಲ್ಲಿ ಗೋಲ್ ಹೊಡೆಯುವ ಮೂಲಕ ಸಮಬಲ ಸಾಧಿಸುವಲ್ಲಿ ಕಾರಣರಾದರು. ಮೂರು ಮತ್ತು ನಾಲ್ಕನೇ ಕ್ವಾರ್ಟರ್’ನಲ್ಲಿ ಉಭಯ ತಂಡಗಳು ಯಾವುದೇ ಗೋಲ್ ಹೊಡೆಯದ ಕಾರಣ ಪಂದ್ಯ 1-1 ಗೋಲ್’ನಿಂದ ಸಮವಾಯ್ತು. ಆನಂತರ ಪೆನಾಲ್ಟಿ ಶೂಟೌಟ್’ನಲ್ಲಿ ಭಾರತ ಅದ್ಭುತ ಪ್ರದರ್ಶನ ನೀಡಿತು. 4-2 ರಿಂದ ಜಯ ಸಾಧಿಸಿತು. ಗೋಲ್ ಕೀಪರ್ ಶ್ರೀಜೇಶ್ 2 ಗೋಲ್’ಗಳನ್ನು ಉಳಿಸುವ ಮೂಲಕ ಜಯದ ರೂವಾರಿಯಾದರು.