ಶ್ರೀನಗರ: ಕಾಶ್ಮೀರದಲ್ಲಿ ಬುಡಮೇಲು ಕೃತ್ಯಗಳಲ್ಲಿ ತೊಡಗಿರುವ ಉಗ್ರರಿಗೆ ಪಾಕಿಸ್ತಾನದ ಸರಕಾರ ಮತ್ತು ಸೇನೆ ನೀಡುತ್ತಿರುವ ಬೆಂಬಲಕ್ಕೆ ಮಹತ್ವದ ಸಾಕ್ಷ್ಯ ಸಿಕ್ಕಿದೆ.
ಶುಕ್ರವಾರ ಬುಡ್ಗಾಮ್ನಲ್ಲಿ ನಡೆದ ಎನ್ಕೌಂಟರ್ನಲ್ಲಿ ಭದ್ರತಾಪಡೆಗಳು ಜೈಷೆ ಮೊಹಮ್ಮದ್ನ ಇಬ್ಬರು ಉಗ್ರರನ್ನು ಹೊಡೆದುರುಳಿಸಿದ್ದು, ಒಬ್ಬನನ್ನು ಬಂಧಿಸಿವೆ. ಈ ವೇಳೆ ವಶಪಡಿಸಿಕೊಳ್ಳಲಾದ ಶಸ್ತ್ರಾಸ್ತ್ರಗಳಲ್ಲಿ ಪಾಕಿಸ್ತಾನ ಸೇನೆಯ ಯೋಧರು ಬಳಸುವ ಅಮೆರಿಕ ನಿರ್ಮಿತ ಎಂ4 ಕಾರ್ಬೈನ್ ರೈಫಲ್ ಕೂಡಾ ಸೇರಿದೆ. ಪಾಕಿಸ್ತಾನವೇ ನೇರವಾಗಿ ಈ ರೈಫಲ್ಗಳನ್ನು ಉಗ್ರರಿಗೆ ಒದಗಿಸುತ್ತಿರುವುದಕ್ಕೆ ಇದು ಪುರಾವೆಯಾಗಿದೆ.
ಇದು 3ನೇ ಬಾರಿ: ಪಾಕ್ ಯೋಧರು ಬಳಸುವ ಅಮೆರಿಕನ್ ರೈಫಲ್ ಉಗ್ರರ ಕೈಯಲ್ಲಿ ಪತ್ತೆಯಾಗುತ್ತಿರುವುದು ಇದು 3ನೇ ಬಾರಿ. 2017ರ ಅಕ್ಟೋಬರ್ನಲ್ಲಿ ಮಸೂದ್ ಅಜರ್ನ ಅಳಿಯ ತಲ್ಹಾ ರಶೀದ್ನ ಎನ್ಕೌಂಟರ್ ನಡೆದಾಗ ಇದೇ ಶಸ್ತ್ರ ದೊರಕಿತ್ತು. 2018ರ ಅಕ್ಟೋಬರ್ 31ರಂದು ಪುಲ್ವಾಮಾ ಜಿಲ್ಲೆಯ ಟ್ರಾನ್ನಲ್ಲಿ ಜೈಷೆ ಉಗ್ರರನ್ನು ಸದೆಬಡಿದ ಸ್ಥಳದಲ್ಲೂ ಎಂ4 ರೈಫಲ್ ಸಿಕ್ಕಿತ್ತು.
ಪಾಕ್, ಅಮೆರಿಕ ಸೈನಿಕರು ಬಳಸುವ ಎಂ4 ರೈಫಲ್
ಎಂ4 ಕಾರ್ಬೈನ್ ರೈಫಲ್ಗಳು ಅರೆಸ್ವಯಂಚಾಲಿತ, ಮೂರು ಸುತ್ತು ಗುಂಡು ಹಾರಿಸಬಲ್ಲ ಶಸ್ತ್ರ. ಅಮೆರಿಕ ಹಲವಾರು ಯುದ್ಧಗಳಲ್ಲಿ ಇದನ್ನು ಬಳಸಿದ್ದು, ಪಾಕಿಸ್ತಾನಕ್ಕೂ ಮಾರಾಟ ಮಾಡಿದೆ. ಅಮೆರಿಕ ಯೋಧರು ಇದನ್ನು ಪ್ರಧಾನವಾಗಿ ಬಳಸುತ್ತಾರೆ.
ಪುಲ್ವಾಮಾ ಘಟನೆಯ ಬಳಿಕ ಭದ್ರತಾ ಪಡೆಗಳು ಕಣಿವೆಯಲ್ಲಿ ಉಗ್ರರನ್ನು ನಿರಂತರವಾಗಿ ಸದೆಬಡಿಯುತ್ತಿದ್ದು, ಕಳೆದ 24 ಗಂಟೆ ಅವಧಿಯಲ್ಲಿ ಆರು ಮಂದಿ ಹತರಾಗಿದ್ದಾರೆ. ಗುರುವಾರ ಶೋಪಿಯಾನ್ ಎನ್ಕೌಂಟರ್ನಲ್ಲಿ ನಾಲ್ವರು ಹತರಾಗಿದ್ದರೆ, ಶುಕ್ರವಾರ ಬುಡ್ಗಾಮ್ನಲ್ಲಿ ಇಬ್ಬರು ಪಾಕಿಸ್ತಾನಿ ಮೂಲದ ಜೈಷೆ ಉಗ್ರರನ್ನು ಕೊಂದು ಹಾಕಲಾಗಿದೆ.