ಮೂಡುಬಿದರೆ: ದೇವರಿಗೆ ಪ್ರೀತಿಯೇ ಮುಖ್ಯ. ಆತ ಎಲ್ಲವನ್ನೂ ಕೊಡುವವನು. ದ್ವೇಷಿಸುವವರನ್ನೂ ಪ್ರೀತಿಸಿ ಅವರ ಹೃದಯ ಗೆಲ್ಲುವುದು ನಮ್ಮ ಗುಣವಾಗಿರಬೇಕು. ಎಲ್ಲರನ್ನೂ ಪ್ರೀತಿಸುವ ಮತ್ತು ಎಲ್ಲರಲ್ಲಿಯೂ ಪ್ರೀತಿ ಹಾಗೂ ಧರ್ಮಶ್ರದ್ಧೆಯ ಮನೋಭಾವನೆಯನ್ನು ಅರಳಿಸುತ್ತಿರುವ ತಮ್ಮ ಗುರುಗಳಾದ ಶ್ರೀ ಕಾಶೀಮಠಾಧೀಶ ಶ್ರೀಮತ್ ಸುಧೀಂದ್ರ ತೀರ್ಥ ಸ್ವಾಮೀಜಿಯವರೇ ಇದಕ್ಕೆ ಉತ್ತಮ ನಿದರ್ಶನ ಎಂದು ಶ್ರೀ ಕಾಶೀಮಠದ ಶ್ರೀಮತ್ ಸಂಯಮೀಂದ್ರ ತೀರ್ಥ ಸ್ವಾಮೀಜಿ ನುಡಿದರು. ನಾಲ್ಕು ದಿನಗಳ ಮೊಕ್ಕಾಂಗಾಗಿ ಮಂಗಳವಾರ ಸಂಜೆ ಇಲ್ಲಿನ ಮೂಡುವೇಣುಪುರ ಶ್ರೀ ವೆಂಕಟರಮಣ ದೇವಸ್ಥಾನದಲ್ಲಿ ಮೊಕ್ಕಾಂಗೆ ಚಿತ್ತೈಸಿದ ಶ್ರೀಗಳವರು ಸೇರಿದ ಸಮಾಜಬಾಂಧವರನ್ನು ಉದ್ದೇಶಿಸಿ ಆಶೀರ್ವಚನ ನೀಡಿದರು.
ಗುರುಪುರ ಮೊಕ್ಕಾಂನಿಂದ ಆಗಮಿಸಿದ ಶ್ರೀಗಳವರನ್ನು ದೇವಳದ ಪ್ರಾಂಗಣದಲ್ಲಿ ಗೌರವಾದರ ಸಹಿತ ಸ್ವಾಗತಿಸಲಾಯಿತು. ದೇವಳಕ್ಕೆ ಭೇಟಿ ನೀಡಿದ ಶ್ರೀಗಳವರ ಉಪಸ್ಥಿತಿಯಲ್ಲಿ ಪೂಜೆ ನಡೆಯಿತು. ಬಳಿಕ ನಡೆದ ಸಭಾ ಕಾರ್ಯಕ್ರಮದಲ್ಲಿ ಆಡಳಿತ ಮೊಕ್ತೇಸರ ಜಿ.ಉಮೇಶ್ ಪೈ ಸ್ವಾಗತಿಸಿದರು. ದೇವಳದ ಆಡಳಿತ ಮಂಡಳಿಯ ಮೊಕ್ತೇಸರರು ಉಪಸ್ಥಿತರಿದ್ದರು.
ಶ್ರೀಗಳವರು ಡಿ17ರಂದು ಒಂಟಿಕಟ್ಟೆ ಪ್ರಶಾಂತ್ವಾಟಿಕಾದಲ್ಲಿ ಸಹಸ್ರಚಂಡಿಕಾಯಾಗದ ಪೂರ್ಣಾಹುತಿ ಕಾರ್ಯಕ್ರಮ ಡಿ18ರಂದು ಬೆಳಿಗ್ಗೆ ತಪ್ತ ಮುದ್ರಾಧಾರಣೆ ಕಾರ್ಯಕ್ರಮದಲ್ಲಿ ಭಾಗವಹಿಸಲಿದ್ದಾರೆ. ಡಿ19ರಂದು ಬೆಳಿಗ್ಗೆ ಶ್ರೀ ಹನುಮಂತ ದೇವಳಕ್ಕೆ ಚಿತ್ತೈಸಿ ಶ್ರೀಗಳವರಿಂದ ದೇವರಿಗೆ ಸೀಯಾಳಾಭಿಷೇಕ ನಡೆಯಲಿದೆ. ಅಂದು ಸಂಜೆ 6ರಿಂದ ಶ್ರೀಗಳವರ ಆಶೀರ್ವಚನ, ಫಲಮಂತ್ರಾಕ್ಷತೆಯ ಬಳಿಕ ಉಡುಪಿ ಮೊಕ್ಕಾಂಗೆ ಶ್ರೀಗಳವರನ್ನು ಬೀಳ್ಕೊಡಲಾಗುತ್ತದೆ.