ಮಂಗಳೂರು: ಮೂಡುಬಿದಿರೆ ಬಸ್ ನಿಲ್ದಾಣದ ಬಳಿ ಮಾರುತಿ ಓಮ್ನಿ ಕಾರಿನಲ್ಲಿ ಜಿಂಕೆಯ ಕೊಂಬುಗಳನ್ನು ಅಕ್ರಮವಾಗಿ ಮಾರಾಟ ಮಾಡಲು ಯತ್ನಿಸುತ್ತಿದ್ದ ಮೂವರು ಆರೋಪಿಗಳ ಸಹಿತ ಅಂದಾಜು ಐದು ಲಕ್ಷ ರೂ. ಮೌಲ್ಯದ 4 ಜೊತೆ ಜಿಂಕೆಯ ಕೊಂಬುಗಳನ್ನು ವಶಪಡಿಸಿಕೊಳ್ಳಲಾಗಿದೆ.
ಬಂಧಿತರನ್ನು ಪುತ್ತಿಗೆ ಪದವು ನಿವಾಸಿ ಮುಹಮ್ಮದ್ ವಸ್ಸೀರ್(22), ಬೆಂಗಳೂರು ಪಿಎನ್ಟಿ ಕಾಲೋನಿ ನರಸಿಂಹ ಬ್ಲಾಕ್ನ ಫಿರೋಸ್ ಖಾನ್(30) ಹಾಗೂ ದಾವಣಗೆರೆ-ಚೆನ್ನಗಿರಿ ಉಬ್ರಾಣಿಯ ಗಿರೀಶ್(23) ಎಂದು ಗುರುತಿಸಲಾಗಿದೆ.
ಆರೋಪಿಗಳು ದಾವಣಗೆರೆಯ ಉಬ್ರಾಣಿಯಿಂದ ಜಿಂಕೆಯ ಕೊಂಬುಗಳನ್ನು ಅಕ್ರಮವಾಗಿ ತಂದು ಇಲ್ಲಿ ಮಾರಾಟ ಮಾಡಲು ಗ್ರಾಹಕರಿಗಾಗಿ ಹುಡುಕಾಡುತ್ತಿದ್ದ ಈ ಕುರಿತು ಬಂದ ಖಚಿತ ಮಾಹಿತಿಯಂತೆ ಕಾರ್ಯಚರಣೆ ನಡೆಸಿದ ಸಿಸಿಬಿ ಪೊಲೀಸರು ಆರೋಪಿಗಳನ್ನು ಬಂಧಿಸಿ 4 ಜೊತೆ ಜಿಂಕೆ ಕೊಂಬುಗಳು, ಒಂದು ಮಾರುತಿ ಓಮ್ನಿ ಕಾರು, 4 ಮೊಬೈಲ್ ಫೋನ್ ಗಳನ್ನು ವಶಪಡಿಸಿಕೊಂಡಿದ್ದಾರೆ.
ಆರೋಪಿಗಳ ಪೈಕಿ ಫಿರೋಸ್ ಖಾನ್ ದರೋಡೆ ಪ್ರಕರಣದ ಆರೋಪಿಯಾಗಿದ್ದು, ಆತನ ವಿರುದ್ಧ ಪ್ರಕರಣ ದಾಖಲಾಗಿ ನ್ಯಾಯಾಲಯಲ್ಲಿ ವಿಚಾರಣೆಗೊಂಡು ಖುಲಾಸೆಗೊಂಡಿತ್ತು. ಸಿಸಿಬಿ ಇನ್ಸ್ಪೆಪೆಕ್ಟರ್ ವೆಲೆಂಟೈನ್ ಡಿ’ಸೋಜ ಹಾಗೂ ಪಿಎಸ್ಐ ಶ್ಯಾಮ್ಸುಂದರ್ ಹಾಗೂ ಸಿಬ್ಬಂದಿಗಳು ಕಾರ್ಯಚರಣೆಯಲ್ಲಿ ಪಾಲ್ಗೊಂಡಿದ್ದರು.