ನವದೆಹಲಿ: ಇತ್ತೀಚೆಗೆ ತೆರೆ ಕಂಡಿರುವ ಸನ್ನಿ ಲಿಯೋನ್ ಅಭಿನಯದ ರಾಗಿಣಿ ಎಂಎಂಎಸ್-2 ಚಿತ್ರ ಹಿಂದೂಗಳ ಧಾರ್ಮಿಕ ಭಾವನೆಗೆ ಧಕ್ಕೆಯುಂಟುಮಾಡಿದೆ. ಹೀಗಾಗಿ, ಆ ಚಿತ್ರದ ಪ್ರಚಾರಕ್ಕೆ ತಡೆ ನೀಡಬೇಕು ಮತ್ತು ಸನ್ನಿ ಲಿಯೋನ್ ಳನ್ನು ದೇಶದಿಂದ ಹೊರಗಟ್ಟಬೇಕು ಎಂದು ಆಗ್ರಹಿಸಿ ಹಿಂದೂ ಜನ ಜಾಗೃತಿ ಸಮಿತಿ ರಾಷ್ಟ್ರೀಯ ಸೆನ್ಸಾರ್ ಮಂಡಳಿಗೆ ಮನವಿ ಸಲ್ಲಿಸಿದೆ.
ಒಂದೊಮ್ಮೆ ಚಿತ್ರಕ್ಕೆ ನಿಷೇಧ ಹೇರದಿದ್ದರೆ ಚಿತ್ರಮಂದಿರಗಳ ಮುಂದೆ ಪ್ರತಿಭಟನೆ ನಡೆಸುವುದಾಗಿ ಸಂಘಟನೆ ಎಚ್ಚರಿಕೆ ನೀಡಿದೆ. ಚಿತ್ರ ಭಾರತೀಯ ಸಂಸ್ಕೃತಿ ಮತ್ತು ಧಾರ್ಮಿಕ ಭಾವನೆಗೆ ಧಕ್ಕೆಯುಂಟುಮಾಡುತ್ತಿದೆ. ಪವಿತ್ರ `ಹನುಮಾನ್ ಚಾಲಿಸಾ” ಮೂಲಕ ಆರಂಭವಾಗುವ ಚಿತ್ರದಲ್ಲಿ ನಟೋರಿಯಸ್ ಪೋರ್ನ್ ಸ್ಟಾರ್ ಸನ್ನಿ ಲಿಯೋನ್ ತನ್ನ ಅಶ್ಲೀಲ ಭಂಗಿಗಳನ್ನು ಪ್ರದರ್ಶಿಸುತ್ತಾಳೆ. ಇದರಿಂದ ಹಿಂದೂಗಳ ಧಾರ್ಮಿಕ ಭಾವನೆಗೆ ಧಕ್ಕೆಯುಂಟಾಗಿದೆ.
ಸಮಾಜದಲ್ಲಿ ಅತ್ಯಾಚಾರ, ಅನಾಚಾರಗಳಂತಹ ಘೋರ ಕೃತ್ಯಗಳು ಮಿರಿ ಮೀರುತ್ತಿರುವ ಈ ಸಂದರ್ಭಗಳಲ್ಲಿ ಇಂತಹ ಚಿತ್ರಗಳು ಸಮಾಜವನ್ನು ಮತ್ತಷ್ಟು ಹಾಳುಗೆಡವುತ್ತವೆ ಎಂದು ಮನವಿ ಪತ್ರದಲ್ಲಿ ಹಿಂದೂ ಜನ ಜಾಗೃತಿ ಸಂಘಟನೆ ಆರೋಪಿಸಿದೆ.