ಮಂಗಳೂರು: ಮಾವಿನ ಹಣ್ಣಿನ ಸೀಸನ್ ಇಲ್ಲದ ಸಮಯದಲ್ಲಿ ಮಾವಿನ ಹಣ್ಣಿನ ದಾಹ ತೀರಿಸಬಹುದಾದ ಫ್ರೂಟಿ ತಂಪು ಪಾನೀಯದಲ್ಲಿ ಹಾವಿನ ಮರಿ ಪತ್ತೆಯಾದ ಘಟನೆಯೊಂದು ಭಟ್ಕಳದಲ್ಲಿ ಎ.23ರಂದು ವರದಿಯಾಗಿದೆ. ಭಟ್ಕಳದಲ್ಲಿ ಇದಕ್ಕಿಂತ ಜ್ಯೂಸಲ್ಲೂ ಹಾವಿನ ಮರಿ ಪತ್ತೆಯಾದ ಬಗ್ಗೆ ವರದಿಯಾಗಿತ್ತು.
ಈ ಘಟನೆ ನಡೆದಿದ್ದು ಭಟ್ಕಳದ ನಿಶಾಂತ್ ಆಸ್ಪತ್ರೆಯಲ್ಲಿ. ಮಹಿಳೆಯೋರ್ವರು ಹೆರಿಗೆಗೆಂದು ನಿಶಾಂತ್ ಆಸ್ಪತ್ರೆಯಲ್ಲಿ ದಾಖಲಾಗಿದ್ದರು. ಈ ವೇಳೆ ಸಂಬಂಧಿ ಮಹಿಳೆಯೋರ್ವರು ಆಗಮಿಸಿ ಸ್ಥಳೀಯ ಸಿದ್ದಿಕ್ ಫಾರ್ಮಸಿಯಿಂದ ಫ್ರೂಟಿ ಖರೀದಿಸಿ ಅಲ್ಲಿದ್ದವರಿಗೆ ವಿತರಣೆ ಮಾಡಿದ್ದರು. ಅದರಲ್ಲಿ ಮೊದಲನೆಯ ಪ್ಯಾಕೆಟನ್ನು ಬಿಚ್ಚಿ ಕುಡಿಯಲಾಗಿತ್ತು. ಮತ್ತೊಂದು ಪ್ಯಾಕೆಟನ್ನು ಹುಡುಗಿಯೋರ್ವಳು ಅದರಲ್ಲಿನ ಸ್ಟ್ರಾವನ್ನು ಸಿಕ್ಕಿಸಿ ಕುಡಿಯಲಾರಂಭಿಸಿದಳು. ಈ ಸಂದರ್ಭದಲ್ಲಿ ಸತ್ತ ಹಾವಿನ ಮರಿಯೊಂದು ಹೊರಬರಲಾರಂಭಿಸಿತು. ಇದನ್ನು ಕಂಡ ಆಕೆ ವಾಂತಿ ಮಾಡಲಾರಂಭಿಸಿದ್ದು ಇಡೀ ಆಸ್ಪತ್ರೆಯಾದ್ಯಂತ ಸುದ್ದಿಯಾಗಿತ್ತು. ಈ ಸುದ್ದಿ ಅಲ್ಲಿನ ಸುತ್ತಮುತ್ತ ಹರಡಿಕೊಂಡು ಸ್ಥಳೀಯರು ಆಸ್ಪತ್ರೆಗೆ ಆಗಮಿಸಿದ್ದಾರೆ.
ಈ ಬಗ್ಗೆ ಭಟ್ಕಳದ ಸಹಾಯಕ ಕಮಿಷನರ್, ತಹಶಿಲ್ದಾರ್ ಹಾಗೂ ಫೂಟ್ ಇನ್ಸ್ಪೆಕ್ಟರ್ಗೂ ದೂರುಹೋಗಿದ್ದು ಅವರು ಎ.23ರರಂದು ಭಟ್ಕಳದಲ್ಲಿರದ ಕಾರಣ ಮರುದಿನ ಆಗಮಿಸಿ ತನಿಖೆ ಕೈಗೊಂಡಿದ್ದಾರೆ. ಹೀಗೆಯೇ ಆದರೆ ಇಂಥಾ ಜ್ಯೂಸ್ಗಳ ಅಸಲಿ ಕಥೆಯೇನು? ಕಂಪೆನಿಯನ್ನು ನಂಬುವುದಾದರೂ ಹೇಗೆ ಎಂಬ ಪ್ರಶನೆಯನ್ನು ಸ್ಥಳೀಯರು ಕೇಳಿದ್ದಾರೆ.