ಪೊಳಲಿ: ಪೊಳಲಿ ಬ್ರಹ್ಮಕಲಶೋತ್ಸವದ ವಿಧಿವಿಧಾನಗಳು ಆರಂಭಗೊಂಡು 8 ದಿನ ಕಳೆದಿದೆ. ಆರಂಭದ ದಿನದಿಂದ ಇಲ್ಲಿಯವರೆಗೆ ಸಾವಿರಾರು ಮಂದಿ ಸ್ವಯಂ ಸೇವಕರು ಹಗಲು-ರಾತ್ರಿ ಎನ್ನದೆ ಹಲವು ರೀತಿಯ ಕೆಲಸಗಳನ್ನು ಮಾಡಿ ಸಹಕರಿಸುತ್ತಿದ್ದಾರೆ. ಎಲ್ಲಾ ಸ್ವಯಂಸೇವಕರು ಅತ್ಯಂತ ಶ್ರದ್ಧೆಯಿಂದ ಎಲ್ಲಾ ಕೆಲಸಗಳನ್ನು ಮಾಡುತ್ತಿದ್ದಾರೆ. ಈ ಎಲ್ಲಾ ಕೆಲಸಕ್ಕಿಂತ ಅತ್ಯಂತ ಕಷ್ಟವಾದ ಕೆಲಸ ಎಂದರೆ ಅದು ಬಾಣಸಿಗ ಕೆಲಸ.
ಏಕೆ ಗೊತ್ತೇ? ಬ್ರಹ್ಮಕಲಶೋತ್ಸವ ಪ್ರಾರಂಭಗೊಂಡು ಇಲ್ಲಿಯವರೆಗೆ ಲಕ್ಷಾಂತರ ಭಕ್ತರು ದೇವಸ್ಥಾನಕ್ಕೆ ಬಂದು ಹೋಗಿರುತ್ತಾರೆ. ಅವರಿಗೆಲ್ಲಾ ರುಚಿಯಲ್ಲಿ ಶುಚಿಯಲ್ಲಿ ಯಾವುದೇ ರೀತಿಯ ಕೊರತೆಯಾಗದಂತೆ ಅಡುಗೆಯನ್ನು ಮಾಡಿ ಬಡಿಸುವುದು ಎಂದರೆ ಸುಲಭದ ಮಾತಲ್ಲ. ಈವರೆಗಿನ 8 ದಿನಗಳ ಕಾಲ ಅಂದಾಜು ಐದು ಲಕ್ಷ ಮಂದಿ ಊಟೋಪಚಾರ ಸೇವಿಸಿಕೊಂಡು ಹೋಗಿದ್ದು, ಯಾರಿಗೂ ಊಟ ತಿಂಡಿಗೆ ಕೊರತೆಯಾಗದಂತೆ ನಿಬಾಯಿಸುವು ಅತ್ಯಂತ ಸವಾಲಿನ ಕೆಲಸವಾಗಿದೆ.
ಪ್ರಾರಂಭದ ದಿನದಿಂದ ಇಲ್ಲಿಯವರೆಗೆ ಹಲವಾರು ರೀತಿಯ ಭೋಜನಗಳನ್ನು ತಯಾರಿದ್ದಾರೆ. ಆದರೆ ಯಾವುದೇ ಕೆಲಸದಲ್ಲಿ ತೊಂದರೆಯಾಗದಂತೆ ಈ ವರೆಗೆ ಎಲ್ಲಾ ಕೆಲಸಗಳನ್ನು ಅಚ್ಚುಕಟ್ಟಾಗಿ ನಿಭಾಯಿಸಿರುತ್ತಾರೆ. ಬಾಣಸಿಗರ ಈ ಕೆಲಸ ಅತ್ಯಂತ ಪ್ರಶಂಶನೀಯ. ಕಳೆದ 8 ದಿನದಿಂದ ಇಲ್ಲಿಯವರೆಗೆ ಹತ್ತಾರು ಬಗೆಯ ಭೋಜನಗಳ ಉಣಬಡಿಸಿರುತ್ತಾರೆ. ಅವುಗಳನ್ನು ನೋಡುವುದೇ ಒಂದು ಕುಶಿ. ಐವತ್ತು ಮಂದಿ ಬ್ರಾಹ್ಮಣರ ತಂಡದಲ್ಲಿ ಸುಮಾರು 200ಕ್ಕಿಂತಲೂ ಹೆಚ್ಚಿನ ಬಾಣಸಿಗರಿದ್ದು ಇವರಿಗೆ ಸ್ವಯಂಸೇವಕರು ಸಾಥ್ ನೀಡುತ್ತಿದ್ದಾರೆ.