ಆಟೊ ದರ ಇಳಿಕೆಗೆ ಜಿಲ್ಲಾಧಿಕಾರಿ ಸಮರ್ಥನೆ

ಸುದ್ದಿ9 ಮಂಗಳೂರು: ನೆರೆಯ ಜಿಲ್ಲೆಗಳು, ರಾಜ್ಯಗಳಿಗೆ ಹೋಲಿಸಿದರೆ ದಕ್ಷಿಣ ಕನ್ನಡ ಮತ್ತು ಉಡುಪಿ ಜಿಲ್ಲೆಯಲ್ಲಿ ಮಾತ್ರ ಆಟೊರಿಕ್ಷಾ ಬಾಡಿಗೆ ದರ ದುಬಾರಿಯಾಗಿದ್ದು, ಈ ಹಿನ್ನೆಲೆಯಲ್ಲಿ ದರ ಇಳಿಕೆ ಮಾಡಿರುವ ತಮ್ಮ ನಿರ್ಧಾರ ಸರಿ ಎಂದು ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿ ಎ.ಬಿ.ಇಬ್ರಾಹಿಂ ಸಮರ್ಥಿಸಿಕೊಂಡಿದ್ದಾರೆ.
ಪೆಟ್ರೋಲ್, ಡೀಸೆಲ್ ಹಾಗೂ ಗ್ಯಾಸ್ ದರ ಇಳಿಕೆ ಹಿನ್ನೆಲೆಯಲ್ಲಿ ಬಸ್ ಮತ್ತು ಆಟೊ ಪ್ರಯಾಣ ದರಗಳನ್ನು ಹೆಚ್ಚಿಸಿ ಹಿಂದೆ ಮಾಡಿದ್ದ ಆದೇಶವನ್ನು ಹಿಂದಕ್ಕೆ ಪಡೆದದ್ದೇ ವಿನಃ ಕಡಿಮೆ ಏನೂ ಮಾಡಿಲ್ಲ ಎಂದು ಭಾನುವಾರ ತಮ್ಮ ನಿವಾಸದಲ್ಲಿ ಸುದ್ದಿಗಾರರ ಪ್ರಶ್ನೆಗೆ ಉತ್ತರವಾಗಿ ಹೇಳಿದರು.
ಮುಂಬಯಿಯಲ್ಲಿ ಆರಂಭಿಕ 1.5 ಕಿ.ಮೀ.ಗೆ 17 ರೂ. ಮತ್ತು ಮುಂದಿನ ಒಂದು ಕಿ.ಮೀ.ಗೆ 11.33 ರೂ. ಕಳೆದ ಆಗಸ್ಟ್‌ನಲ್ಲಿ, ಕಾಸರಗೋಡಿನಲ್ಲಿ ಮೊದಲ 1.5 ಕಿ.ಮೀ.ಗೆ 20 ರು. ಮತ್ತು ನಂತರದ ಒಂದು ಕಿ.ಮೀ.ಗೆ 10 ರೂ., ಚೆನ್ನೈನಲ್ಲಿ ಆರಂಭಿಕ 1.8 ಕಿ.ಮೀ.ಗೆ 25 ರೂ. ಮತ್ತು ನಂತರದ ಒಂದು ಕಿ.ಮೀ.ಗೆ 12 ರೂ. ಅಕ್ಟೋಬರ್‌ನಲ್ಲಿ, ಮೈಸೂರಿನಲ್ಲಿ 1.9 ಕಿ.ಮೀ.ಗೆ 25 ರೂ. ಮತ್ತು ನಂತರದ ಒಂದು ಕಿ.ಮೀ.ಗೆ 13 ರೂ. ಜನವರಿಯಲ್ಲಿ ನಿಗದಿಪಡಿಸಲಾಗಿದೆ.
ಬೆಂಗಳೂರಿನಲ್ಲಿ 2013ರ ಡಿಸೆಂಬರ್‌ಗೆ ಆರಂಭಿಕ 1.9 ಕಿ.ಮೀ.ಗೆ 25 ರೂ. ಮತ್ತು ನಂತರದ ಪ್ರತಿ ಕಿ.ಮೀ.ಗೆ 13 ರೂ. ನಿಗದಿಪಡಿಸಿದ್ದು, ಅದನ್ನು ಕಡಿಮೆ ಮಾಡಲಾಗಿದೆ. ಬೆಳಗಾವಿ ಹಾಸನ, ಮಡಿಕೇರಿ, ಧಾರವಾಡ, ಶಿವಮೊಗ್ಗದಲ್ಲೆಲ್ಲೂ 20 ರೂ.ಗಿಂತ ಹೆಚ್ಚು ದರ ಇಲ್ಲ. ಇಲ್ಲೆಲ್ಲಾ ಕಳೆದ ವರ್ಷ ದರ ನಿಗದಿ ಮಾಡಲಾಗಿತ್ತು. ಉಡುಪಿಯಲ್ಲಿ ಮಾತ್ರ 1.5 ಕಿ.ಮೀ.ಗೆ 25 ರೂ. ಹಾಗೂ ನಂತರದ ಪ್ರತಿ ಕಿ.ಮೀ.ಗೆ 16 ರೂ. ನಿಗದಿ ಮಾಡಲಾಗಿದೆ. ಇಡೀ ರಾಜ್ಯದಲ್ಲಿ ಮೊದಲು ದರ ಏರಿಕೆ ಮಾಡಿದ್ದು ಇಲ್ಲಿ, ಹಾಗೆಯೇ ಇಳಿಕೆ ಕೂಡಾ ಮಾಡಿದ್ದೇವೆ ಎಂದು ಅವರು ಹೇಳಿದರು.
36.83 ಮೊತ್ತದ ಒಂದು ಕೆ.ಜಿ. ಗ್ಯಾಸ್‌ನಲ್ಲಿ ಆಟೊರಿಕ್ಷಾ 20-25 ಕಿ.ಮೀ. ಓಡುತ್ತದೆ. ಇದರ ಪ್ರಕಾರ ಒಂದು ಕಿ.ಮೀ.ಗೆ ವೆಚ್ಚವಾಗುವುದು ಬರೀ 1.5 ರೂ. ಮಾತ್ರ. ಬೇರೆ ಎಲ್ಲ ಖರ್ಚು ಸೇರಿಸಿದರೂ 8-9 ರೂ. ಮಾತ್ರ ವೆಚ್ಚವಾಗುತ್ತದೆ. ಆಟೊಗೆ ಬಳಸುವ ಇಂಧನ, ಎಂಜಿನ್ ಆಯಿಲ್, ಗ್ರೀಸ್, ಟಯರ್, ಬಿಡಿ ಭಾಗಗಳು, ಮಾಸಿಕ ನಾಲ್ಕು ರಜೆ, ಎರಡು ಅನಾರೋಗ್ಯದ ರಜೆ, ಎರಡು ದಂಡ ಇತ್ಯಾದಿ ಹಾಕಿ ತಗಲುವ ವೆಚ್ಚದ ವರದಿ ನೀಡಲು ಸೂಚಿಸಲಾಗಿದೆ ಎಂದರು.
ದರ ಇಳಿಸಲು ಕೋರ್ಟ್‌ನಿಂದ ಯಾವುದೇ ಆದೇಶ ಅಥವಾ ತಡೆಯಾಜ್ಞೆ ಬಂದಿಲ್ಲ. ಕೆಲವರು ಇಂಥ ಸುದ್ದಿ ಹರಡುತ್ತಿದ್ದಾರೆ. ದರ ಇಳಿಕೆ ಮಾಡಿರುವ ಬಗ್ಗೆ ಸಚಿವರು ಅಥವಾ ಕೋರ್ಟ್ ಮಾಹಿತಿ ಕೇಳಿದರೆ ನೀಡಲು ಸಿದ್ಧರಿದ್ದೇವೆ. ಮೀಟರ್‌ನಲ್ಲಿ ದರ ಮರುನಿಗದಿಗೆ 3 ತಿಂಗಳ ಅವಕಾಶ ನೀಡಿದ್ದೇವೆ. ಹೆಚ್ಚಿನ ದರ ವಸೂಲಿ ಮಾಡಿದರೆ ದೂರು ಸ್ವೀಕರಿಸಲು ಸಹಾಯವಾಣಿ ಆರಂಭಿಸಲಾಗುವುದಿಲ್ಲ. ಆಟೊ ಚಾಲಕರಿಗೆ ಅನ್ಯಾಯ ಮಾಡುವುದಿಲ್ಲವೆಂದು ಡಿಸಿ ಭರವಸೆ ನೀಡಿದ್ದಾರೆ.