ಬಂಟ್ವಾಳ: ಪರಸ್ಪರ ಪ್ರೀತಿಸುತ್ತಿದ್ದು, ಮನೆಮಂದಿಗೆ ಅಂಜಿ ಮನೆ ಬಿಟ್ಟು ತೆರಳಿದ್ದ ಯುವ ಜೋಡಿಯನ್ನು ಪತ್ತಹಚ್ಚಿ ವಿಶ್ವ ಹಿಂದೂ ಪರಿಷತ್ ಹಾಗೂ ಬಜರಂಗದಳದ ಕಾರ್ಯಕರ್ತರು ಬುಧವಾರ ವಿವಾಹ ಭಾಗ್ಯ ಒದಗಿಸಿದ್ದಾರೆ.
ಪಂಜದ ಯುವಕ ಹರಿಪ್ರಸಾದ್ ಹಾಗೂ ಬಾಳ್ತಿಲದ ಯುವತಿ ಮಮತಾ ಪರಸ್ಪರ ಪ್ರೀತಿಸುತ್ತಿದ್ದರು. ಇದನ್ನು ಮನೆಮಂದಿಗೆ ತಿಳಿಸಲು ಅಂಜಿದ ಜೋಡಿ ಮನೆಬಿಟ್ಟು ಮಂಜೇಶ್ವರಕ್ಕೆ ತೆರಳಿದ್ದರು. ಈ ಬಗ್ಗೆ ಮಾಹಿತಿ ಪಡೆದ ವಿಶ್ವಹಿಂದು ಪರಿಷತ್ ಹಾಗೂ ಬಜರಂಗದಳದ ಕಾರ್ಯಕರ್ತರು ಅವರನ್ನು ಪತ್ತೆಹಚ್ಚಿ ಮತ್ತೆ ಊರಿಗೆ ಕರೆತಂದು ಉಭಯ ಮನೆಯವರನ್ನು ಒಪ್ಪಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಬುಧವಾರ ಬೆಳಿಗ್ಗೆ ದಾಸಕೋಡಿಯ ಕಲಾಶ್ರಯದಲ್ಲಿ ಕಶೆಕೋಡಿ ಸೂರ್ಯನಾರಾಯಣ ಭಟ್ಟರ ನೇತೃತ್ವದಲ್ಲಿ ಅವರಿಗೆ ಕಂಕಣ ಭಾಗ್ಯ ಒದಗಿಸಿದ್ದಾರೆ.
ಈ ಸಂದರ್ಭ ಜಿ.ಪಂ.ಸದಸ್ಯ ಚೆನ್ನಪ್ಪ ಕೋಟ್ಯಾನ್, ತಾ.ಪಂ.ಸದಸ್ಯ ದಿನೇಶ್ ಅಮ್ಟೂರು, ಗ್ರಾ.ಪಂ.ಸದಸ್ಯ ಪಿ.ಎಸ್.ಮೋಹನ್, ಬಜರಂಗದಳದ ಸಂಚಾಲಕ ಗುರುರಾಜ್ ಬಂಟ್ವಾಳ್, ಪ್ರಮುಖರಾದ ಶರತ್ ನೀರಪಾದೆ, ಪ್ರದೀಪ್ ಅಜ್ಜಿಬೆಟ್ಟು, ಶಿವರಾಜ್ ಕಾಂದಿಲ, ವಿಶ್ವನಾಥ ನೀರಪಾದೆ, ಮತ್ತಿತರರು ಹಾಜರಿದ್ದರು.
